دمتم عرب يا عرب...

بينما إسرائيل منغمسة و مستمتعة بـعمليّة "الرصاص المتدفّق", الحكومات العربية تمتّع فينا بإستعراض "كيف تكون عربي نقيّ"...حيث بعد أحداث غزّة قعدو مصر و حماس يتعاركو شكون عندو الحق يتعدّى من معبر رفح : مصر قالت تقبل كان الجرحى فقط و الأحياء المهدّدين بالموت في كل لحظة بول عليهم... و حماس قالت : الأحياء اللي عندهم عامين قاعدين يموتو قطرة قطرة اولى بالعبور إلى مصر و الجرحى ليهم ربّي...
تي كي مصر تحب تعاون و جايبتها جعب العرب ماو تعاون كما يجب و يزّيها من الحلول الوسطى و اللّعب على الحبلين...لكن هذا اللي نستنّاوه من بلاد فيها 4 كرز و ملاين عايشين تحت الصفر و زيد كل عام تاخذ في المساعدات من عند امريكا يعني كي تعمل اي تصرف ما يعجبش "ماما امريكا" يتقص عليها المصروف. و لهنا الفقر موش عيب لكن العيب الفقر و الفرعنة ...تي برة وكّل شعبك و إستقل على العدو متاعك و مبعّد إيجا احكيلي على كيفاش إنتي قوة إقليمية و عندك و دور كبير في حلاّن مشاكل الشرق الأوسط والعرب بصفة عامّة.. ديجا برشة من المثقفين في مصر قالوا اللي الشعب المصري عايشين بـ"إدحك يا عمّ, ما تشيلشي همّ" و غيرها من وسائل هزّان المورال ـ و لهنا زادة تفكرت فازة أخرى : الزعيم عرفات كان عايش و معيّش شعبو بـ"يا جبل ما يهزّك ريح" و "شعب الصمود" و غيرهم...اهوكة نفع ياسر الشعب الفلسطيني بالترّهات متاعو مع إحترامي بالطبيعة للمجهود اللي عملو على خاطر القضيّة -
و حماس نورمالمون تقبل المساعدة المعفّطة متاع مصر و تزيد تطالب بمساعدات افضل ـ سياسة "خذ و طالب" كيما قال بورڨيبة ـ و يزينا من العقليات المسكّرة و عقدة يا جنّة يا نار. ماو ارضى بالشي اللي جاك و زيد حربط على شويّة آخر. الغلطة اللي عملوها قبل 50 سنة ـ متاع يا ناخذ الكل يا لاـ يعاودو فيها توة. على الأقل قبل عملوها مع إسرائيل و امريكا عند بداية الإحتلال لكن توة عرب في بعضهم يعاودو فيها و قعدو يعملو في عرك اجوف و ما نجموش حتى يتفاهمو كيفاش يمنّعوا اللي تضربو واللي مازالو باش يتضربو...
الحاصل كي العادة والله يقطعها عادة "إتّفق العرب على ان لا يتّفقوا" و بقاو يتبادلو في التهم و كل واحد يحمّل لآخر المسؤليّة ويبقى العدو فرحّا مسرورًا بالمساعدات المعنوية اللي تجيه من عند العرب لتسهيل إحتلالهم و التنكيل بيهم و الأهم من هذا الضّحك عليهم. يعني حتّى لو كان مصيرنا نتفناو على يديهم, التاريخ ماهوش باش يذكر لا إستبسال و لا شجاعة على الميدان و لا حتّى رجوليّة من وراء المنابر...مجرّد قوم متخلّف و علّة على المجتمع الدّولي... مجرّد قوم عاجز حتى على "العجز الكريم",عاجز عن الإحتفاظ بطرف قدر و كرامة حتّى وهو ما ينجّم يعمل شي ضدّ عدوّو
دمتم عرب يا عرب...

ملاحظة : ما نيش نلوم على الشعب المصري و لا على الشعب الفلسطيني, المشكل في الحكومات و الزعماء

لوقتاش يا كرب؟؟

[1_880880_1_59.jpg][1_880875_1_59.jpg][palestine25-10.jpg][07671a4.jpg]



و اللي زاد نرفزني, بوست لقيتو في فوروم من عام 2002 (هنا)...و قد كُتب فيه:

اخي الكريم قبل كل شئ تمتع بهدوء الاعصاب لانك ستقرأ ما يصدمك

--- في عام 82 بعد مجازر صبرا وشاتيلا خرج مليون متظاهر في بلد المليون ونصف المليون شهيد احتفالاً بانتصار الجزائر على المانيا.
--- في عام 2002 خرج آلاف التونسيون للاحتفال بانتصار الترجي الرياضي بعد مجازر جنين.
--- الاتحاد التونسي للتجارة و الصناعة و اتحاد الفلاحين من اكثر الجهات الرسمية تعاملا مع اسرائيل وصلت الى حد الزيارات الدورية المنتظمة لاسرائيل و عقد صفقات بالملايين .
--- عدا الفنانين العملاء امثال فريد بوغدير و المغنية مليحة التونسية و المغنية امينة
و توئمة مهرجان قرطاج و مهرجان حيفا السينمائي جبل الكرمل
و اساتذة الجامعات امثال صلاح الدين بن عبيد
و غيرهم من كبار رجال الاعمال امثال محمد العمروي صاحب شركة فوياج الفين و فنادق في سوسة و الحمامات
و الوكيل في صفاقص وشركات بولينا و استر انفورماتيك و باتام و ماجول انفورماتيك و بن جنات للذهب و بن عياد و بن جمعة
وبعض رجال الدولة والاطباء غيرهم...الخ
--- هناك اكثر من 450 اسماً بارزاً في تونس ممن يطبعون مع اسرائيل حتى كتابة هذه السطور
--- فريق كرة الطائرة الذي انتصر في المغرب مثال على التطبيع الرياضي الوحيد في العالم العربي بين تونس و اسرائيل
--- المعدات الصناعية و الزراعية و غيرها التي صنعت في اسرائيل و التي تغرق السوق التونسية مثل الآلات الزراعية و البذور و الشتلات التي يستوردنها اما مباشرة او عن طريق فرنسا و هولاندة مع علمهم ببلد النشاء اسرائيل بعلم و موافقة و تشجيع الطبقة الحاكمة و غير ذلك بكثير مما سوف ينشر في كل المنتديات العربية.
--- محطة كهرباء مدينة رواد التي يبنها الامريكان و اليابانيون الآن بمعدات اسرائيلية الصنع و بتجهيزات اسرائيلية.

و انا معاه نقول زادة "اللعنة على العرب", لكن العرب عندي ما عادش إسم متاع جنس معين او عرق.... لكن مجرد رمز للتعبير على أي حاجة متخلفة, عاجزة, مذرّحة, مريضة, واطية... ديجا حتى في لغتنا اي حاجة ميهاش في المستوى او قديمة,إلخ... نقولولها "X عربي"
و يظهرلي حتّى كي واحد يقول : "سيدنا النبي عربي" يقصد يسبو و يهينو موش مجرّد يعرّف بيه او يفكّر فينا بأصلو...
دمتم عرب يا عرب... شعوب قزوردية... لكن بألوان أخرى

قم لـ"هذا" المعلّم و وفّه التنكيلَ...

عالصباح نقرى اللي ثمّة معلّم قتل واحد من تلامذتو في مصر بعد ما عطاه "ركلة" في كرشو جابو بارك... و هذا الكل على خاطر التلميذ و عمره 11 عام ماخدمش طرف من التمارين اللي عطاهملو. و ملّلول نوى المعلّم باش يربّيه بطريقة حضارية من خلال الضرب بالعصى و التوبيخ و مشتقاتهم من الأفعال التربو-تخلّفية, لكن التلميذ أبى ان يُربّى فقتله لتعدّيه على "التعدّي" على حقوق الطفل و الإنسان بصفة عامّة...
و وقتلي انا نقرى في الخبر,كان تكريزي بلا حدود: اولّ حاجة هي الحكاية بطبيعتها تكرّز: طفل صغير جاي باش يقرى, يتضرب حتى الموت لسبب تافه - ديجا اي سبب مهما كان يتّسمى تافه اذا كان نتيجتو طفل يموت - و زيد ولد الكلبة اللي قتلو عمرو 23 عام !!! إي نعم 23 عام يعني نورمالمون جوناس و يفهملها و معبّي مخو بالتفتّح و الرّيق الحضاري و لغة الحوار البنّاء... لكن الظاهر اللي كيما مصر كيما تونس كيما ايّ بلاد عربية اللي يشدّ دين أم كرسي مهما تكون اهميّتو او تفاهتو و يحصّل ربع سُلطة بين يديه مخو ديراكت يعمل ميزاجور بالتوالي و يرجع تفكيرو للعهد الطباشيري و يولّي ما يفْهم و ما يفهّم كان بالضرب و التهنتيل و تطييح القدر و مبعّد يقولو شبينا ما عادش ننتجو في ابناء خلدون جدد و ابناء رشد جدد و غيرهم من ابناء (او بالأحرى آباء) الفكر الحرّ و التخمام المستوي
توّة لا يزّي التلامذة يعانيو في معانية زرقة في ظل غياب اي نوع من انواع النظام حيث ان الـstaff الكل متاع المكتب او المعهد من العسّاس إلى المدير مرورًا بمعارفهم و اصحابهم عندهم الحق يسبّو و يهنتلو التلميذ و يعيّطوا عليه و ساعات يبراكيوه عيني عينك, حيث يفكّولوا كاسكاتو او الـIpod متاعو و غيرهما من المواد القابلة للإستعمال و خاصّة القابلة للبيع و يصادروها بحجّة إنها مواد ممنوع تداولها في اللّيسي بينما كي واحد يـ.يك ضربة شمس على طاسّة مخّو أو ياخو هوا على راسّو أو حتى يحسّ روحو مهنتل من غير كاسكاتو اتو وقتها تولّي القراية تدخل لراسو و يطلعلنا جعب في علم من العلوم
نرجع للقضيّة متاع التلميذ المصري اللي هو طفل قبل كل شئ حيث حُكمو على "المربّي" بستّة سنين حبس فقط و نقول "فقط" بالفم المليان على خاطر يظهرلي يستاهل حكم اقوى من هكّة رغم إقتناعي بأنو ما كانش يقصد يقتلو لكن كي يرتكب الجريمة هاذي واحد من مربّي الاجيال تاخذ القضيّة ابعاد اخرى و حجم اكبر من مجرّد قضية قتل غير متعمّد. و اللي زاد أشعل الطّين بلّة تصريح المحامي متاع المتّهم حيث قال دفاعًا على سي مرزبّة :"إنّ موكلي مدرس حاصل على عدة مؤهلات تربوية تمنعه من اقتراف واقعة قتل التلميذ"... تي ايّ واحد حتّى جاهل و جاي من ورا الشمس تمنعو فطرتو من إقتراف جريمة كيما هاذي... و زيد المشكل هنا انّو مدرس و نورمالمون تبدى عندو مؤهلات بداغوجية تمنعو من تربية الصغار اللي يقرّي فيهم بالضرب و بالمشطة في كروشهم مهما كانت الدواعي و الاسباب
بون يمكن انا مكبّر الحكاية لكن "كون مام" حكاية تفجع و تعطيك لمحة صغيرة على المستقبل المشرق اللي يستنّى فينا احنا و اللي باش يجيو بعدنا ديجا عندي أيامات قريت في مدونة اللي مديرة معهد عطات لتلميذ (خو صاحبة التدوينة) كفّ على خاطرو حبّ يقرى ميثاق الشباب قبل ما يصحّح عليه
و ثمّة شكون (كيما الوالدة عندي) يقول الفازة هاذي صارت في برشة بلدان اخرين و ميهاش مقصورة على المجتمعات العربية لكن حسب تجربتي المتواضعة مع شريط الانباء نسمع ديما اللي الاشخاص اللي يقوموا بمثل هذه العمايل مرضى نفسيا و عندهم مشاكل عقلية و خلاف هذا حتى حد منهم قتل تلميذ في إطار تأهيله علميًا و تربويًا....

... تونس و العرب و المسلمين بخير


تكركير بلا حدود...

يفعل الجاهل بنفسه ما لا يفعله العدوّ بعدوّه, خلي عاد كان العدوّ يحلّب بعدوّو بهيم و يستغل التصطيكة متاعو...

إنزل هنا و أضحك, إبكي...من الضحك,... تصرّف

رغم سواد و مداد المدوّنة...

تدوينة بيضاء ضد الحجب...









نعرف اللي "التدوينة البيضاء" لا تعني بالضرورة بيضاء اللون....

آخر تدوينة فيها كلمة "صبّاط"

خبر اليوم :
" لم يتم ضرب احد الرؤساء باي صبّاط عربي او ڨاوري...."
انا عجبتني شوية حكاية الصبّاط و يمكن إعتبار هذا الإعجاب "تصرّف غريزي" نظرًا لما حدث في العراق على ايدي الأمريكان و حلفائهم لكن الحكاية خذات اشكال و ابعاد اخرى و ولّيت كي ندخل لمجمع مدونين او اي موقع إخباري نحس روحي في فريب الحفصيّة من كثرة الصبابط المعلقة هنا و هناك...
وتقسم العالم بين المؤيدين للصباطيزم و بين منتقدين و واحد يقول تصرّف شجاع و تعبير على الغضب العربي إزاء الأمريكان و لاخر يقول مجرّد تصرّف ڨعر لا يليق بصحافي و يشوّه صورة الإعلام العربي... بون انا ما نجمش نبدى حيادي في حاجة كيما هكة و ما نجّمش ننكراللي برشة "مشاعر خالجتني" كيما قال الراجل إزاء التصرف هذا لكن كي تخمم في حاجة مرتين ساعات رايك يتبدل و تجيك اسئلة أخرين. زعمة لو كان بوش مازال شاد كرسي الرئاسة في امريكا و ماكانش يحتضر سياسيا كان باش تم الأمور بالطريقة هاذي و باش توجد ردّات الفعل اللي نراو فيهم توة؟ زعمة زعماء امريكا الجنوبية ـ اللي هوما اكبر حكام دكتاتوريين ـ باش يبقاو يتمقعرو عليه في الإجتماع اللي عملوه ؟ رغم انّو معروف كرههم لأمريكا لكن ما نضنّش كان باش يعبروا عليه بالطريقة هاذي لولا حادثة الصبّاط يعني الشجاعة هاذي الكل جاية من مبدأ " كي تطيح البقرة تكثر سكاكنها" و لو كان جاو ها الزعماء يتكلم هكّة كي كان بوش في طمبكو يمكن يكون ثمة كلام آخر...
كذلك ما ننساوش اللي بوش تحشالو من الجهات الكل , و اوّلهم من جهة الشعب الأمريكي يعني لو كان بوش توّة ياكل كفّ يقولو هو الغالط و هو اللي ضرب وجهو على يد لآخر و لازمو يتحمّل المسؤلية كاملة.. معناها يصح عليه وصف "وليّة" ـ ما نقصد حتى إساءة لا للـ"ولايا" و لا للنساء بصفة عامة ـ إذن بالنسبة اللي عطاو الصبّاط اكثر من حجمو الطبيعي, كي يتضرب رئيس او حتّّى جرد وزير-مازال ناشط في المنصب متاعو- بصبّاط او بكلسيطة من ساقين واحد وطني للعنكوش وقتها نجّمو نقيّموا الأذان و نقسّمو التاريخ بين ما قبل الصبّاط و ما بعد الصبّاط.
والعالم الكل يعرف اللي الشعب العراقي يحبّ بوش كره العمى بالصبّاط او بلاش, و الإعلام العربي علّق الصبّاط من هاك العام من قبل ما يرميوه يعني ما تضرّش برشة من الفازة او بمعنى اصح ما تضرّش جملة, " لا يضر الشاة رميان الصبّاط بعد ذبحها "
و اللي تضرّ في الحكاية هو نحنا اللي ولّينا منين ندوّرو وجوهنا نلقاو صبابط هنا و هناك تلهّينا على برشة حاجات تهمّنا اكثر من الصبّاط و بوش و حتى العراق نفسو... اللي لو كان نتلهاو بيهم الحاجات هاذم و نشوفو كيفاش نلقاولهم حل, نمنّعو رواحنا و بلادنا من ان نصبح عراق ثاني و يولّي عندنا مالكي ثاني او بالأحرى قرضاي ثالث..

من فنون الإستغباء...

هاذي من الحاجات البهيمة ياسر اللي قريتها في فوروم و ديجا من قبل ديما نلقى منها في وحدة من صنادق الرسائل سواء كانت الإلكترونية او الورقية و ساعات نلقاها حتّى في التليفون :
كان شابا في الصف الثالث الثانوي وكان بارا بوالديه
في يوم إستلام شهادة الفصل الدراسي الأول
عاد من المدرسة فرحا وهو حائز على نسبة 96% فاستقبل والده فرحا وعندما رأى
الأب الشهادة إحتضن ولده
وقال : أطلب ما تشاء
فرد الولد سريعا : أريد سيارة
وكان يريد سيارة باهضة الثمن
فرد الأب : والله لأحضر لك شيء أغلى من السيارة
ففرح الولد ولكن الأب قال : على شرط أن تتخرج بنسبة تماثلها أو تكون أعلى منها
وتمر الأيام وتبدأ الدراسة ويتخرج الإبن بنسبة 98% فعاد والبهجة تملء وجهه
أبي.. أبي.. أبي.. فلم يجد أباه فقبل رأس أمه وسألها إن كان الأب في البيت أم لا
فردت : إنه في مكتبه
وعندما عاد رأى الأب شهادة إبنه فقال له : خذ هديتك فأعطاه مصحف
فرد الإبن : بعد كل هذا التعب تعطيني مصحف ؟
فرمى المصحف على وجه أبيه وقبل أن يغادر المنزل قال: لن أعود الى هذا البيت..!!!
وشتم أباه وغاد المنزل.
وبعد عدة شهور ندم الولد على فعلته فعاد إلى بيته وكان أباه قد توفى
فوجد المصحف في غرفته فتحسر على ما فعله وأراد أن يقرأ بعض الآيات فإذا به يفاجئ
أن المصحف ما هو الا علبة وداخله مفتاح السيارة التي كان يريدها فأصيب الولد بشلل ولم يستطع الكلام بعدها وأجهش بالبكاء ...
بون الحكاية هاذي قريتها و تأثرّت برشة... لكن مبعّد لملمت شتات نفسي و مسحت دموعي و قعدت نخمّم شويّة ضهرلي اللي بوه ياسر بهيم : عامل مصحف باكو متاع كادو !! تي هاو عمل اكثر من الكفار هذا, يعني يستاهل اللي صارلو و بعبارة اوضح طاح فيه ربي كيما يقولوها... لكن بصفة عامة الحكايات هاذم يكّرزوني من نوعية "فلان في بلد عربي شقيق..., و فتاة من عايلة محترمة في مقتبل العمر...,هات من هاك اللاّوي...
في الوقت هذا الخبر لازم يبدى دقيق و واضح و بالتصاور و الفيديو كان لزم موش مجّرد كلام مرمي في الهواء. و العباد اللي ينشرو النوع هذا من الأخباريستعملو تقنيات صغار باش تجد علينا الخرافات متاعهم و نحسّو بالتعاطف مع ابطال الرواية, اهوكة تلقى الحكاية فيها ديمة شيخ تقي من فلسطين حلم بالرسول و اِمرَأة فاضلة من العراق جاها ميساج من فوق فيه كذا و كذا... بون العراق تحركت فيها الأمور و بداو يحلموا من الوقت اللي بدات فيه الحرب و يمكن مدة أخرى تشعل الحرب في بلاد عربية أخرى اتو يوليو زادة يحلمو فيها... و غريبة كيفاش العباد الي يطلّعوا الحكايات هاذم يمشي في مخاخهم اللي الحكاية الحولة متاعهم باش تلقى مخاخ فارغة تحتضنها و ترحب بيها و الغريبة أكثر اللي بالحق ثمة عباد يجد عليهم و يبداو يبعثو في الـ SMS و الإميلات و يطبعو في منشورات "البهامة" و يفرّقو فيهم على مخاليق ربي مما يزيد في ارتفاع نسبة انتقال العدوى بالبهامة بين الشعب الكريم
و ثمة شكون يدافع على الحكايات هاذم و يقول العبرة في المغزى متاع الحكاية و الإستفادة من الحكم اللي تتضمّنها... تي اما عبرة و اما حكم في حكاية كلها بصّ مدقع و لا ليها لا ساس و لا راس ؟؟! تي اوّل حاجة لازم نتعلّموها هي الإبتعاد على الكذب و تبين الخيط الأبيض من الخيط الأسود و اي خيوط فيها اي الوان أخرى بعيدة على لون الحقيقة و المنطق المقبول سواء في الكلام اللي نقولوه او نسمعوه. و لو كان جاء حاجتنا بالعبر و الحكم اهوكم حكايات المرحوم الله يرحمو jean de lafontaine كلهم منافع و مواد مقوية للمخ و عيني عينك يصارحك ملّلول اللي الحكاية ما عندها حتى علاقة بالواقع و اي تشابه في الأحداث هو من قبيل الصدفة البحتة...

زبراطولوجيا


قبيلة نتفرج في برنامج إسمو " Brainiac " و يعنيو بيها "المهووسين بالعلم" و كل مرة يعملو تجربة سخيفة نوعًا ما: هاو وقفو على عضمة و هي في وضعية عمودية باش يشوفوها تتكسّر و إلاّ لا, عملو سباق بين موتور و صاروخ... و تفاهات من هذا القبيل. لكن عملوا تجربة على حاجة تهم كل أعضاء حزب الدّيك خاصّة و ان الريفيون على الأبواب.و التجربة هاذي الغاية منها تحديد احسن علاج لأثار ما بعد الثمالة
اللي تتمثل في جفاف الفم و ذلك لأن الكحول تنقّص في نسبة السوائل في الجسم خلاف اللي هي مدرّة للبول (حاشاكم) كذلك ثمة الوجاعة متاع الكرش من جرة فقدان المعدة للانزيمات متاعها و بالطبيعة وجاعة الرّاس.
هو لا محالة أحسن دواء الواحد ما يكثرّش من أصلو لكن بما أنّو ساعات الشيخة تحكم و القعدة تحلى قامت المجموعة هاذي من الـBrainiac بالتجربة حيث بلعوه ڨنّوط بإسم العلم و في الصباح كي قامو قسّموهم لثلاث مجموعات :
المجموعة A : شربت دوايات متاع وجاعة و فيتامينات
المجموعة B : كلات فطور إنڨليزي تقليدي ( مقلي)
المجموعة C : إستوحاو طريقة العلاج من أبو نوّاس "داويني باللتي كانت هي الداء" و زادو شربوا دوزات خفاف عالصباح
و بعد مرور بضع ساعات سجلت المجموعة B تحسن ملحوظ مقارنة بالمجموعات الأخرى حيث نقصت التكوخيرة و رجعو في حيوية و نشاط... إذن نصيحة لكل الناوين على بلعة راس العام : يحضرو صحيّن كفتاجي بالكبدة و ياكلوه على الخوا لتفادي تمضية نهار اڨزح في اوّل نهار في العام الجديد او في أي نهار يعقب مناسبة تستوجب الإحتفال بالڨزاز و أخواتو...

إنجاز يفرهد

في الأيام هاذي كل ما نطيح بمادّة إخبارية سواء كانت مقرؤة او مسموعة يجيني إحساس بالجوجمة و التكريز العاطي شوية على الكآبَة : إمتحان سياسي باش ندوبلو فيه للمرّة الرّابعة ـ المرّة الأولى ما تتحسبش بالطبيعةـ و يمكن ثمّة دوبيلة خامسة و سادسة إلاّ إذا كان عزرائيل او أحد مندوبيه ياخذ موقف...، الأحداث الصايرة في الحوض المنجمي و تجلّي الديمقراطية في احلى حللها القزوردية...، الحادثة المؤسفة متاع بوش و الصبّاط "المنتظر" و انا قلت مؤسفة على خاطر ما جاش فيه لكن حتّى لو كان خطفت فيه حتّى شئ ما يتبدّل اللّهم يولّي الفيديو يضحّك اكثر...، الإقتصاد العالمي ماكل كبّوط و إنتشار الأزمة و كل يوم خبر جديد على شركة تفلس و معمل يسكّر...هو لا محالة برشة قالوا اللّي الأزمة خاطيتنا لكن توة ماعادش تصدق حتّى حد...، حصار غزة و عجز الكرب على تقديم المساعدة اللاّزمة من دواء و غذاء و فوق هذا يجي كلب الأزهر يسلّم على بيريز و يستعمل حجج كي وجهو لتبرير ذلك و لهنا في تونس يعديو فيلم يدافع على اليهود و يطالب بالتعاطف معاهم بسبب المحرقة المشكوك حتّى في وجودها..، و خلاف الأحداث اليومية في بلادنا اللي نقراهم في الجرايد من نوع نضرة، فڨحرة، فتشوحيرة، فسبّة، فعركة، فدغرة، فدفينة... و زيدهم الأخبار على الزيادة في الأسعار و النقص في كميّة الدراشنوّة...
لكن البارح نقرى في جريدة لقيت خبر يفرّح شوية في وسط الخوماضة هاذي و هو إكتشاف دواء للبرص على يد دكتور تونسي علما و ان البرص تبلغ نسبة الإصابة بيه 2% عالميا و زادة يوجد في تونس 200 الف مريض بيه و باش يقوم الدكتور هذا و إسمو رشاد صميدة بتسجيل براءة الإختراع في الأيام القادمة. بون مانيش باش ندخل في التفاصيل متاع الإكتشاف لعدم توفر وسع البال لكتابة أسامي العقاقر و المواد المستعملة، لكن حسب الجريدة تمّ إثبات نجاعة العلاج هذا اللي يمتد على عامين و قالوا زادة اللّي ثمة شكون بدى يتحسن بعد 4 اشهر فقط من العلاج. توة انا ما عندي حتى علاقة بالبرص من بعيد او قريب لكن الواحد يفرح كي يلقى إنجاز تونسي في مجال كيما هذا. برجولية انا كرّزت من الإنجازات متاعنا المتمثلة في اكبر قصعة كسكسي و اكبر كاس سيتروناد و اطول كعبة ڨاطو...و كل إنجاز عندو علاقة بالنشاطات الهضمية للإنسان. ديجا ثمة حكيم قديم لكنو مازال حي قال: "من كان همّه (او بالأحرى إنجازاته) في بطنه، كانت قيمته ما يخرج منها" و من هنا نجموا نستخلصو شنوة قيمة إنجازاتنا و قيمة اللي انجزوها في نظر أي واحد عندو مخ و اوّلهم جماعة Guinness اللي نمشيو نجريولهم و نفرّحو فيهم بإنجازاتنا المتقدمة للخلف اللي هوما بالطبيعة يعرفو اللي قيمة أي شعب تتمثل في إنجازاتو اللي يفتخر بيها إذن هوما مقتنعين اللي قيمتنا....
الحاصل أنا فرهدني شوية الخبر هذا لكن نظرًا للطبيعة التشاؤمية متاعي نعرف اللي باش تتعدى مدّة طويلة قبل ما نقرى حاجة أخرى من النوع هذا...

حي على الجهاد، حي على الكوناكسيون...

في الأيام اللي فاتت كثرت حكاية "الجهاد الإلكتروني" حيث يقوم إسلاميون عندهم موهبة في القرصنة بتفرڨيع مواقع خاصة بأعداء الإسلام مما يتسبب في تعطيل مصالحهم و تكبيدهم خسائر ماليّة و زادة إنتشرت ظاهرة تكوين مجموعات على الفايسبوك و غيرو من المواقع من نوع "معا من اجل نصرة رسول الله" ," انا مسلم" ,إلخ... و ساعات يوليو يخلوضو و يدافعو على حاجات غالطة و كمثال على ذلك: كونوا مجموعة تحت إسم "لنجمع 1.000.000.000 صوت لنقول للامريكان لا تبنو بار بشكل الكعبة المشرفة". قبل كل شئ حكاية البار على شكل الكعبة ما ثماش منها من اصلو هو فقط مبنى زجاجي و مكعّب غطّاوه بقماش اكحل لين يكملوا يبنيوه (إنزل هنا ثم هنا) و ماهوش بار من أصلو يعني في الحقيقة هو المشروع هذا مشروع لجمع 1.000.000.000 بهيم و حسب تجربتي المتواضعة مع المسلمين والعرب يظهرلي ميهاش صعيبة برشة الحكاية و ينجمو يلمّوهم في مدة قصيرة - بون باش نخرج شوية على الموضوع لكن حكاية ال1.000.000.000 صوت فكرتني بفازة قريتها في يومية حيث دار زعيم من زعماء الهنود الحمر و قال للي معاه "لو كان جينا ذبان و نقعدو نزنزنو على راس الرجل الأبيض اتو يكرّز و يخرج" و الكلام هذا قالو كي جاو السبنيور يستعمرو فيهم و ما نضنّش كان الهنود كانو في العهد هذاكة عددهم اكبر من المسلمين و العرب في الوقت الحالي-
نرجع للجهاد الإسلامي, توة بالنسبة لتفرڨيع المواقع هاذي تتسمى حاجة فعّالة بغضّ النظرعلى الّلي هي باهية او خايبة على خاطر ثمة إمكانية وقوع "مدنيين" لا علاقة لهم بالحكاية كضحايا لهذه الهجمات الإلكترونية و غيرو من المشاكل و الأعراض الجانبية... لكن تكوين مجموعات إفتراضية شنوة الفايدة متاعو؟ ديجا الواحد ما يخسر على الحكاية كان نزلة على فلسة و ساعات ينزل عليها لمجردّ الماخذة في الخاطر بفلان او فلتانة. زعمة باش نورّيو اللي رغم اللي نحنا في بلاد عربية عندنا إنترنات؟ هل انّ تكوين مجموعات كيما هاذي لا تقدم و لا توخر يدخل في نطاق الحملة اللانهائية لإحياء السنّة ؟؟ و خلاف هذا امريكا او إسرائيل وغيرهم من الدول المساندة ليهم ميهاش باش تغيضهم برشة اللي أحنا عاملين مجموعات على الفايسبوك. تي انا يضهرلي اللي هوما مذابيهم نعبرو على تكريزنا في العالم الإفتراضي باش الضغط اللي عنّا ما يبقاش مشدود في صدورنا لين يتفرڨع بطرق أخرى تمسهم او تمس الطحّانة متاعهم.
انا بالطبيعة مشارك في عدة مجموعات و منهم مجموعة "لنجمع 1.000.000.000 صوت لنقول للامريكان لا تبنو بار بشكل الكعبة المشرفة" لكن لمجرّد الإطلاع و البحث على المنفعة من تكوينها و كذلك للتزريق و إعطاء رأي فيها بالكشي واحد منهم يجاوبني و يقنعني بالفايدة متاعها لكن لا حياة لمن تنادي... الكل ما فالحين كان في قصّان و تلصيق الأحاديث و الآيات اللي توعد المسيئين للإسلام بجهنم و بئس المصير.
بالطبيعة ما نجموش نحكيو على الجهاد من غير ما نحكيو على التطرف و الإرهاب و انا كنت ضحيّة ليه في الايام الفارطة حيث جيت نحل في الـPc خرجتيلي بلاكة مكتوب فيها"Don't Worry MeTaLLisTiC I am not an ENEMY " و مبعد كي ننزل OK يتبدل الـfond d'écran و تجي التصويرة الكلاسيكية متاع الـ XP(اللي فيها سهلٌ اخضر و سماءٌ زرقاء) و من فوق فيها كلمة الله بالكبير و نولي ماعادش نجّم نبدّلها التصويرة...توة شنوة الهدف متاعو من هذا؟ زعمة عمل هذا باش انا نتفكر ربي كل ما نحل الPc ؟ بون بطبيعتي كي ريت التصويرة ذكرت ربي كيف ما حبيت و إشتهيت لكن بالمقلوب يعني العمليّة اللي صارت كانت مجرّد بهامة و قحب معيز بإسم الدين ما فيه حتّى فايدة كان التأكيد على مبدأ الهمجية و الإكراه في الدين و الإكراه في الـfond d'écran تحديدا..

صبّاط و اشياء أخرى...

كنت في التدوينة هاذي تسائلت على قدّاش باش يولّي سوم الصبّاط اللي رماه الصحفي العراقي منتظر الزيدي على بوش واليوم قريت :
" عرض مواطن سعودي من منطقة عسير شراء حذاء الصحافي العراقي الذي قذف به الرئيس الأمريكي جورج بوش، بعشرة ملايين دولار أمريكي."
توة نورمالمون نفرح انا مادام السؤال متاعي تجاوب عليه لكن...
أنا قبل ما نقرى الخبر هذا قعدت نخمم شوية في اللي صار و هل يمكن إعتبار حادثة الحذاء حاجة باهية و إلا لا؟ رغم الإحساس بالشيخة الوطنية و القومية و أنا نشوف في بوش يتضرب بصبّاط عربي اصيل لكن خممت اللّي كان من الأجدر ضرب الزعماء العرب اللي من جرتهم تعفّس الشعب العراقي تحت صبابط المارينز.اللي تفرجوا في الفيديو لاحظو قوة "الرفلاكس" متاع بوش و زيد كي عرف اللي هي حكاية صبّاط ما عاودش هبط لوطى , لو كان جاء زعيم عربي و شاف واحد وقف و رمى عليه حاجة اللي ما يبقى مهبّط راسّو لين يشدّو الي رمى الحاجة عليه ويحاكموه هو وعيلتو الكل...
نرجعو للسعودي اللي يحب يشري الصبّاط حيث قال اللي هو باش يردو مزار والعباد تبدى تمشي و تجي عليه و ما تجيكش غريبة تولّي تشيّتو بوجوها باش يتبرّكو بيه...يعني حتى في المرّة الوحيدة اللي عمل واحد عربي فيها حاجة شبه صحيحة يجي واحد آخر-و عربي زادة- و يفسّدها. توة كي هو قلبو ياسر حنين و متعاطف مع العراق ماو يتبرع بيهم العشرة مليون دولار للعراق أو يشري بيهم دوايات و ماكلة أو حتّى صبابط ( ما دام السيّد صبّاطوفيل) لأطفال غزة و يزينا من البروباقندا الزايدة و بالطبيعة السعوديين حاطين في مخاخهم اللي نشر خبر كيما هذا باش يحسّن صورة السعودية و مواطينيها لكن لا الفلوس و لا ألف صبّاط ينسي العباد اللي أمريكا كانت تضرب في العراق من قواعدها في السعودية. وخلاف ساعات الحاجة تولّى ياسر غالية كي ما يبداش عندها سوم و الصبّاط صايي دخل للتاريخ من وقتلي ترمى على بوش يعني الحيوان السّعودي هذا نقّص من قيمتو و رخّصو ياسر كي قال اللي هو مستعد باش يشريه بالفلوس. و الصبّاط ولّى رمز في مخّ كل عربي موش مجرّد طرف جلد و خيوط و فرّاشة ـ يمكن التعبير "هازز خشمو" يتبدل و يولّي "هازز صبّاطو" ـ يعني موش لازم شريانو و دفعان فلوس فيه كان يمكن صرفها بطريقة افضل كذلك إقامة مزار ليه ماهوش باش ينفع بحتّى شئ و يمكن "يدنّس" من "القدسية" متاعو او حتى يحرّفها و تاخذ أبعاد أخرى لا علاقة بالقضية الأصلية متاع رميان الصبّاط...
السعودية والخليج و العرب بصفة عامة ما توفاش بهامتهم و فازاتهم "الخصّائة" اللي ديما تلقاهم في الحكايات الصحاح اللي تهمهم و تحكم في مصيرهم تلقاهم محايدين أو هازين ساقيهم موش "صبابطهم" و متضامنين مع عدوهم.. و في الحكايات الفارغة تلقاهم ديما حاضرين بأفكارهم الخلاّقة الدالة على وجود الـ"حتّى شئ" في مخاخهم. و في الأخير تحيّة لشافاز اللي نوّه بشجاعة منتظر الزيدي لكن سمعت اللي العرب يمكن يشكيو بيه لتعاطفو معاهم...

Kill Your God , Kill Your TV..

"التدوينة هاذي قديمة لكنها كانت مكتوبة بلغة الميساجات لأسباب لا داعي لشرحها انا عاودت فقط كتابتها بطريقة لائقة اكثر"

كل ما نمشي للصالون نقول نرتح عيني من الـPC و نمشي نتعّبهم بالتلفزة نندم و نقول آش رجعّني لها الربط , بالطبيعة لازم نقعد نستنّى اللي يتفرج يكمّل الفرجة متاعو ومبعّد نتسلم مقاليد الحكم... و في اغلب الأحيان نلقى الوالدة هي اللي تتفرج و ديمة نلقاها حاطّة كان إقرء و النّاس و اخواتهما من القناوات الإسلامية و يبدى انا يركبني العصب :
إبعث SMS ينوبك أجر من الله , SMS يكلفك القليل و يربحك الكثير, إلخ... و ثمة اللي يقلك أبعث SMS يجي لتليفونك أذان او تسبيح او دعاء إذن ثمة إحتمال واحد يطلبني و انا نبدى نلبي في رغباتي البشرية نسمع "لبيك اللهم لبيك"... اهوكة نلقى فرصة باش نعمل إعتكاف في الميحاض (حاشاكم) ديجا مانيش باش نلقى وقت خيرمن هذاكة لممارسة عباداتي...و زعمة على كل Appel en Absence ناخذ حسنات؟ و كي يبدى تلفون كامل يولي الأجر ارفع ب27 درجة ؟ تفييييه... !
ثمة ممثلة مصرية إسمها عبير صبري كانت رمز من رموز التملهيط في تاريخ السينما المصرية لكن تاب عليها ربي و لبست الخمار و ولات من صلاح البلاد و عاملة برنامج في إقرء و هالة سرحان ديما تجيب فيها باش تحكي على وجهة نظر الإسلام في الموضوع.... لكن كي تراها ما تعرش لابسة حوايج أو إنها داهنة روحها و أكهو و يبدى وجهها على كل لون يا كريمة...حاسيلو شئ يوقّف المخ و يوڨف حاجة أخرى...و زادة غلّبت عليّا سهير البابلي كي لبست الخمار و قالت اللي هي صايي رجعت لربي و قالت حتى كي تمثل باش تحترم حدود الله لكن ثمة لقطة في المسلسل فيها ولدها وهو عزلوك في الثلاثينات قاعد يموت في حجرها و هي تحمّل و تبكي انا بالطبيعة مانيش ضد إظهار حنان الام في التلفزة لكن حسب ما قالولي أهل المهنة نعرف اللي حرام يترمى واحد في حجر وحدة من غير ما تبدى بيناتهم علاقة شرعية..
نجي توة لسوبرستار المسلمين, أوّل من أدخل عقلية الإحتراف في الدين, معبود الجماهير عمرو خالد ( الزّح ناقص كان يوليو يبيعو في بوستارات متاعو..., مهنّد مديّن) سي جعب الدين هذا عندو اكثر من 5 سنين و هو يوعد بشباب جديد مالباكو عندو عقلية إسلامية متطوّرة , جيل كلّو تقوة و حيوية دينية....و لتوّة ما رينا شئ.
نبدى نتفرّج فيه (مكره أخاك لا بطل )و نسبّح للّي خلقني بالمقلوب حيث نلاحظ تركيز الكاميرامان على وحدة "عينيها بحر في يوم ريح" و نبداو نتبعّو بكلنا في الرحلة اللي تعملها دموعها من عينيها لين يوصلو لفمها مادام لاخر عامل زوم بوه كلب على وجها و بعد ما يعبيلك راسك بحكايات إنتي تعرفهم من قبل يبدى يدعي و نبدى انا نستنى في دموعو باش تهبط لكن الشّياح ! و أنا نكرهو و نكره الفصيلة متاعو الكل خاصّة كي نتخيّل كيفاش يبدى يجري عالكاشي متاعو و يبيع و يشري.. و نحسبلك الدعاء بكذا و الآية بكذا و زيدني شوية في سوم الحديث و ساعدني في حق السّورة.
و خلاف هذا عمل فازة ياسر بهيمة كي طلعو التصاور متاع الدنمارك , حيث مشى لغادي في "غزوة" إعلامية مع عبلة الكحلاوي و سرق الأضواء من الجمعيات الإسلامية غادي و ذهب المجهود اللي عملوه باش يتوحدو هباءً...
ديما تلقى في القناوات هاذم برامج متاع إفتاء و العباد تطلب و تتكلم والشيخ يبدى يجاوب.عاد مرّة نتفرج في برنامج "عمّ يتسآلون" في قناة المحور و عاملين حلقة خاصة +18 تحكي على العلاقة بين الراجل و مرتو في الفرش توة بربي ثمة شكون يفكر في شنوة اللي يجي و شنوة ما يجيش وقتها؟ وشنوة حلاوتها الحكاية كان واحد يبدى لاهي يفكر من اصلو وقتها ؟ و ثمة واحد بعث إمييل يسئل فيه على حكم العلاقة الفموية "الفيلاسيون" , بون هي فرحتني الدكتورة سعاد صالح و قالت حلال لعدم وجود نص يحرم ذلك... لكن نفرضو المرا ما حبتش تعملها... إذن يقوم وقتها راجلها و يقيم عليها الحد ؟ و ثمة شكون يقول اللي المرا لازمها تطيع بعلها المصون إبتغاءً لمرضاة الله...معناها كي هي تهبطلو تتسمى الهبطة هاذيكة في مقام سجدة ؟؟ ... أنا نعرف حاجة بركة تحكم في العلاقة الجنسية , وهي إنو العبد ما يبداش قعر و اكهو و كل واحد يتصرف على راحتو... و من غير ما نحكي على الأسئلة المعفطة من نوع : ما هو حكم النظر إلى عضو الزوج او الزوجة؟ ماهو المكان الشرعي لممارسة الجنس؟ ماهو حكم لباس السروال الخيطي (String)؟....شئ مكرز
اقوى فازة طلعت هي متاع فتوى رضاعة الكبير اللي تعتبر الحل لإشكال الخلوة يعني واحد تبدى أمّو مريضة و لازمها فرملي يتلهى بيها, لازمها ترضعو باش يولي في مقام ولدها و مرا باش تاخو تاكسي لازمها ترضع الشيفور باش ماتتقيدلهاش خلوة يعني التاكسيست ياخذ الكورسة متاعو لحم وبالمسبّق... كنا هاربين من الخلوة طحنا في الزنا
هذا الكل و مازال برشة تكريز صار و يصير و باش يصير من العباد هاذم اللي شدو خدمة اللي ما عندوش خدمة, قاعدين كان يتبوهمو بإسم الدين و المشكلة في اللي يسمع و مخو يشرب في كلامهم من غير ما يفلتر

الصبّاط أصدق إنباء...

توة نورمالمون الصبّاط هو المقر الرسمي لأي حاجة خايبة, بدايةً من الساقين الناتنة حتّاكشي الاخلاق الفاسدة لكن البارح 14/12/2008 قام صحفي عراقي بتغيير هذا المفهوم و اصبح الصبّاط رمز للوطنية حيث قام بإلقاء صبّاطو على بوش في مؤتمر صحفي مع رئيس الوزراء العراقي نوري المالكي و كانت ردة فعل بوش حسب موقع العربية : الرئيس الأمريكي رد بابتسامة وقال: "لم أشعر بأدنى تهديد"

و يضهرلي باين من وجهو اللي ماهوش حاسس بحتّى شئ










و حكاية الصبّاط هاذي هي آخر حاجة طاحت على بوش بعد الأزمات و المشاكل اللي هبطو على راسو و راس العالم الكل و لهنا نستحضر فازة في "كلام الليل"
- شنوة الفرق بين الشعب اللي تحبو و اللي ما تحبوش؟
ـ بوش !

و قد أثارت الفازة هاذي برشة ردّات فعل بين العباد و يمكن إعتبارو "خبر الأسبوع" :


بون انا قعد عندي سؤال واحد يدور في مخّي , قداش باش يولي سومو الصبّاط ؟؟

الخصّاؤون

كل واحد فينا في حياتو اليومية يقابل ناس و يحكي مع ناس و يضحك مع ناس و يفدّ من ناس , بالنسبة ليا اللي يفدّوني اكثر مللي يفرهدوني بون هاذي مشكلة شخصية نجّم نمشي على خاطرها لطبيب نفساوي لكن نعرف روحي باش نفد كي نجي باش نكّط 40 دينار من غير ما نحسّ بتحسّن فوري لحالة إرتفاع الفدة اللي عندي و المصيبة اللي مكثرية العباد اللي يفدوني هوما عباد ما عندي بيهم حتّى علاقة كان زهري المـ.يك اللي جمعني بيهم في ساعة "داعرة" يعني قليل وين نلقى الفرصة للتعبير عن مدى تفديدهم ليّا.
و من أكثر العباد اللي يطلعولي الدم و غيرو من السوائل لراسي هوما "المنشّطين متاع الكيران" و هاذم تلقاهم ديما بحذا الشيفور متاع الكار تحت بلاكة "ممنوع الحديث مع السائق" و يبدى يشارك في المهمة التنظيمية لحركة الرّكاب في الكار : في كل محطّة يدور يقابل الراكبين الكل و ياقف كيما ّّّالـ" chef d'orchestre " و يبدى : اهبط إنتي منّا, اطلع إنتي من غادي, ديماري يا حمادي هاو شعل الضو لخضر, إ لخ.... و يستعمل يديه بالطبيعة باش يحسن توجيه الركاب بالكشي واحد منهم نسى منين الباب متاع الهبوط ( اللي هو بالطبيعة الباب الأقرب و بول عليهم البلايك) معناها واحد لا يزي الضيق و التضييق والدز و المرج في الكيران و زيد معاهم العلل هاذم..الحاصيلو جاب ربّي ما نركب في الكار كان كي نجي ماشي للفاك
و ما نعاني من الحكاية هاذي كان مرّة او مرتين في الجمعة.
نوع آخر ينفخهوملي إلى حدّ النخاع هوما اللي كي يسئلك على واحد او حتى يسئلك على روحك وين ماشي و تجاوبو بـ"ماشي بقضية" يقلّك شنية القضية؟ تي دين والديه ماو كان جا عينك باش تحكيلو بالتفاصيل راك قتلو ملّول و رتّحتو و رتّحت روحك من النفخان الزايد... و اللي يزيد يشعل الطين بلّة هو اللّي النوع هذا ينجم يجيك حتى لدارك و يدق عليك الباب و يقيّمك من بلاصتك و مبعد يكسّرهولك بالحوار التافه و الاسئلة البهيمة متاعو.
بون هذا التكريز متاع الشارع و مازال ثمّة امثلة أخرى لكنها غايبة على بالي توّة و هذا من حسن حظّي. و زادة ثمّة عباد أخرين مكرزين و منفخين كما لم يكن أحد و هاذم نلقاهم في الـMSN او الفايس بوك و غيرو من برامج او مواقع الحوار الفوري حيث يجي واحد و يقلّك: ?slt,cava ؟ تقلو ?wé et toi يقلك je v bien و مبعد يسكت شوية و يقلك ?alors koi de neuf تقلو? rien de sepecial et toi يقلك rien وو مبعّد يسود صمت رهيب وتستنى شوية وفي لخّر تكفر عليه في قلبك و ترجع للّي كنت فيه... لا محالة انا ما قلتش ما تحكي مع العباد كان في المصالح و القضيات لكن الحوارات من النوع هذا يفسدو اخلاق العبد و تراصيلّو يقول في كلام يفطرو في رمضان الجّاي و اللّي بعدو.
و من تكريز الانترنات زادة يجيك واحد و يقلك فادد هات سيت باهي نبربشو نقلو شنوة تحب بالضبط يقلي هات حاجة و أكهو, ديراكت انا نبعثو لهنا...
الحاصل الإنسان هو بطبيعتو كائن مُكرز او كرّوزي وساعات الزوز فرد وقت و كل واحد و تكريزو كيفاش يجي وحاجات يبانو عاديين عند زيد يطلعو العصب عند عمْر و كي يجي عمْر يحكي عليهم يطلع لزيد العصب وآش باش يفضّها وقتها... لكن ما ننساوش اللي التكريز يتسمى من احسن الحوافز للإنسان اللي تخليه يحب يبدّل حياتو و يحسّن من وضعيّتو و الله لا يكرّز مومن في ساعة سعيدة

ربّ عذر أقبح من ذنب

في الأيامات الّلي فاتت تقلبت الدنيا و كلات بعضها و عباد تنتقد عباد أخرين يدافعوا.... والخماضة هاذي الكل صارت على خاطر شيخ الأزهر مدّ يدو وسلّم على الرئيس الاسرائيلي شمعون بيريز في إجتماع حوار اتباع الديانات والحضارات والثقافات في الأمم المتحدةو بداو برشة يعيطوا و يطالبوا بعزل بعد المصافحة. توة انا الشيخ ما نلومش عليه كي صافحو على خاطر اي واحد يعرف اللّي لو كان جبد بيه و ما سلّمش عليه أتو تزيد تخمج الاجواء أكثر ما هي خامجة و يزيدو اليهود يلقاو سبب باش يصعّدوا في الرّيتم متاع الضرب و خلاف هذا العالم الكل يلقى سبب آخر باش يزيد يضحك على التفوريخ الإسلامي (زوز رجال كبار عمارهم يلوحوا في 80 سنة و واحد يمد يدو و لاخر يهنتلو)...لا محالة برشة عباد ضحكوا على الاسباب اللّي ذكرها الشيخ اللّي خلاّتو يقوم بمثل ذلك التصرف الشنيع حيث صرّح أنه لم يسبق له أن تعرَّف على بيريز..!!! تصوّروا شيخ الأزهر بكلّو مايعرش بيريز. بيريز اللي يتسمّى من اقوى و اقدم السياسيين في إسرائيل يجي شيخ الأزهر و يقول الفاطشة هاذي ما نعرفهاش ! توة بربّي ثمّة واحد ما يعرفش شمعون بيريز خاصّة كي يبدى يحتل منصب كبير كيما هاذاكة، بالطبيعة ما قلتش لازمو يبدى عامل "إسرائيلبيديا" في مخّو لكن واحد كيما شمعون لازم يكون يعرفو, ديجا السيّد عرصة من عرص إسرائيل و عندو كريار يفجع في التاريخ السياسي لمنطقة الشرق الأوسط
يمكن عدم معرفتو بيه تتفسّر بطريقة أخرى، حيث يمكن إدراج هذا الجهل في باب الحڨرة لكن الحڨرة لشخص كيما هذاكة تعني التحقير للقضية الكل و لهنا تولّي ثمة حشوة أخرى والحاجة اللّي انيك من هذا اللّي السيّد شيخ الأزهر يسخايل العباد بهايم لدرجة يصدقو تبرير معفط كيما الّلي قالو...
هو لو تذكّى شوية و قال اللي المصافحة تدخل في باب القحب الديبلوماسي راهم ما كبشوش في الحكاية بالطريقة هاذيكة والكل نعرفو اللّي السياسة داخلة في كل شئ و اوّل حاجة تتدخل فيها هي الدين، ديجا الوحيد اللّي ينجم يطيّر الشيخ من بقعتو هو رئيس الجمهورية و من هنا نعرفو شكون اللي يحكم في اقوال و مواقف الشيخ و ساعات في الفتاوي متاعو و الشيخ هذا عندو تاريخ قوي في الفتاوي الدينوـ سياسية : منها تأييدو لفرنسا في تبني قانون مثير للجدل يمنع الفتيات المسلمات من ارتداء الحجاب في المدارس الفرنسية معتبرًا ذلك شأنًا داخليًّا، مع أنه واجب تفرضه الشريعة الإسلامية و قام أيضًا بتحليل فوائد البنوك الربوية و زيد البهامة اللّي عملها وقتلي طلعت الحكاية متاع الكاريكاتور الدنماركي وطريقتو الحمقاء في الدفاع ضد الرسومات...
بون انا مانيش قاعد نقول اللي انا إيماني اقوى من إيمانو و اني علاقتي بالدين اوطد من علاقتو لكن كي واحد يشد بلاصة معينة في اي مجال يا يبدى قد المسؤولية متاعو يا يسيّبها و يرتّحنا من التكريز الزايد

تعفيطات عالطائر...

دخلت اليوم لموقع متاع اخبار وقريت حكاية معفطة ياسر: "
أفادت صحيفة "اليوم" السعودية التي نشرت النبأ الأحد بأنه بعد انتهاء المصلين من أداء صلاة الجنازة في المسجد الحرام بمكة المكرمة، ونقله إلى مسقط رأسه بمحافظة مهد الذهب بواسطة عربة نقل الموتى؛ فوجئ جموع المصلين بطائر يحاول بشتى الطرق الدخول إلى العربة، وعند محاولة أقرباء المتوفى إبعاده تدخل عدد من المشايخ، وطالبوهم بعدم المساس به بأي أذى
ورافق الطائر المتوفى لمسافة تصل إلى 350 كلم وهو يقف على رأس المتوفى ويرفع رأسه وينزله مع كل تلاوة من آيات القرآن، ولم يفارق المتوفى حتى لحظة مواراة الجثمان في القبر، ومن ثم طار باتجاه عمودي حتى توارى عن الأنظار...
ونسبت الصحيفة إلى عضو هيئة كبار العلماء في السعودية الشيخ عبد الله بن جبرين قوله: "إن هذه الحادثة دلالة على ما قام به المتوفى من أعمال خيّرة في دنياه، وإن هذه علامة من علامات الصلاح

اول حاجة أنا بهت فيها هي اللي العباد بفضل البورطابل وصلوا صوروا كل شئ بدايةً من تنفيذ حكم الإعدام على صدّام حسين وصولاً إلى هيفاء وهبي و هي في حالة "إنهيار أخلاقي", و ما نجّموش يصوروا عصفور قعد معاهم لين وصلوا للبلاصة اللّي تبعد 350 كم على الجامع اللّي كانوا فيه !! و زاد كي كمّل العصفور الّلي كان يعمل فيه مع الميّت طار "باتجاه عمودي حتى توارى عن الأنظار... " يعني حتى لو كان ما حبّوش يصوروه كي كان فوق راس الميت كانوا ينجموا يخطفولوا تصويرة و هو طالع طاير للسماء في إتجاه عمودي و خلاف هذا اول مرة نسمع ثمة عصفور مشتّل على هليكوبتر... وزادة حتّى حد ما قال اللّي في جنازة واحد من الصحابة جاء عصفور و رافق الجنازة هل يعني هذا اللّي هو كان تقيّ اكثر منهم ؟ يعني حكاية هو متّقي إذن عندو عصفور فوق راسّو ميهاش لوجيك جملة و تفصيلاً و تابعة كتلة الخزعبلات اللّي خزّت في مخاخنا و خلاتنا تكركيرة بين اللّي يسوى و الليّ ما يسواش.
أنا الحكاية بكلها ما دخلتش لمخّي لكن مالڨلڨ إفترضت اللّي الحكاية صحيحة و لقيتها تحتمل اكثر من تفسير : يمكن العصفور عامل عش غادي هذاكة علاش كبّش معاهم و دخل للكرهبة و يمكن زادة هو طائر لاحم ويحب ياكل من الجيفة مادامها مازالت فرشكة و يمكن هوعندوقَضْيَة في البلاصة الّلي باش يدفنو فيها الميّت, إذن قال نمشي معاهم خيرلي مالّلي نبقى طاير في الشهيلي متاع الصحراء و يمكن و يمكن.... و اي تفسيرمن التفسيروهات اللي ذكرتهم ماهوش باش يجي معفط قد التفسير الليّ قالوالشيخ عبد الله بن جبرين الّلي قالت عليه الجريدة الّلي هو عضو من اعضاء هيئة كبار العلماء بالسعودية لكنّي سقصيت عليه و طلع خاطيه حيث كان عضو و كسّروه و يضهرلي بعد الحكاية هاذي باين علاش نطّروه من البلاصة و كذلك الشيخ هذا عندو فتوى مشهورة تجيز و تشجّع على الجهاد ضد الشيعة بطريقة متطرفة ممّا أشعل الطين بلّةً بين السنّة و الشيعة... نرجعو للتفسير متاعو و انا قلت اللي هو "أعفط" من اي تفسير ينجم أي واحد يقولو على خاطر كي يقوم إنسان عادي بتفسير حاجة كيما هاذي ما ثمّاش مضرّة كبيرة بينما كي واحد يسمع شيخ من السعودية و يتسمّى من كبار العلماء و يحكي هكّة ديراكت يقول المسلمين بهايم ما يعرفوش حتّى يعملو ا كذبة باهية تليق بيهم و ديجا تعرفو اللّي مستوى الكذب متاع مجتمع يعكس المستوى الحضاري والثقافي متاعو و احسن مثال على ذلك حكاية الطلوع إلى القمر اللّي طلعت بيها أمريكا يعني حتّى لو كان ما طلعوش بالحق للڨمرة تبقى التعڨيبة قوية ياسر...,و بالطبيعة مع كل حكاية من الحكايات هاذم تتعاود نفس الحكاية الّلي صارت وقتلي جاء واحد كبّول وقال الّلي أحداث 11/09 المباركة مذكورة في القرآن و غيرها من الحكايات البهيمة اللّي تطلع بين الفينة و الاخرى...حاصيلو الله اعلم وين باش نوصلو كان باش نكملو هكّة هذا إذا كان باش نوصلو لحاجة من اصلو

سينمائيات...


بون نعرف الّلي الموضوع الّلي باش نحكي عليه تمّ طرحوا أكثر من مرّة وعلى يد عباد مختصين و على إطلاع اكثر منّي لكّن يدّهم... ديما كل ما يصير حدث جديد في السينما التونسية تعلوا الأصوات بين نبّار و مساند و بين واحد يسب و يقول السينما التونسية تافهة و لاخر يقول نحنا خير من برشة اخرين... انا ما نيش باش نحكي على السينما اون جينرال لكن شد إنتباهي حدث في الأيام اللّي فاتت تجلّت فيه البهامة في ابهى حللها السينمائية والإدارية والتنظيمية, حيث تمّ عرض فيلم "سر" للفرنسي كلود ميلر، و و قد قيل : "..وقاطع عدد من الجمهور عرض الفيلم، وخرجوا مستائين لما وصفوه بـ"خيبة أمل" في تظاهرة بعراقة أيام السينما الأوروبية بتونس، والتي تقام منذ 15 عاما بالعاصمة، وعدة مدن أخرى في البلاد." و سبب المقاطعة هاذي هو اللي الفيلم يتناول أوضاع اليهود خلال الحرب العالمية الثانية، من خلال عائلة يهودية مقيمة في فرنسا، ويقف عند ضحايا المحرقة على أيدي المرحوم هتلر ـ لو كان واحد يهودي يقرى المدوّنة تولّي حشوة...و نورمال ـ و بالطبيعة برشة عباد و منهم العبد لله ما دخلتش لمخّي كيفاش يعديو فيلم هكّة مع تدهور الأوضاع الإنسانية في غزة، جراء الحصار الإسرائيلي المتواصل منذ أسابيع. وعرض فيلم هكّة في وقت كيما هذا يطرح برشة فرضيات و كل فرضية انـ*ك من الاخرى :
المسؤلين التوانسة المشاركين في تنضيم هذا الحدث ماهمش مطلعين على محتوى الأفلام اللّي باش يتمّ عرضها في التضاهرة هاذي و تلك مصيبة و لو كانوا مطلعين و قبلوا باش يعديوه تلك مصيبة اعظمُ و يمكن زادة اللّي هوما ما قبلوش لكن ما عندهمش الحقّ في الإعتراض و تلك أم المصايب و يمكن زادة اللّي الجماعة المسؤلة على المشاركة في التنظيم ـ وعلى رأسهم إبراهيم اللطيف، وهو مخرج سينمائي ورئيس جمعية الفيلم القصير والوثائقي ـ ما في بالهمش الّلي غزّة لاحمة في الأيّامات هاذم...ما توفاش الإحتمالات اللّي يمكن ذكرها لتفسير مثل هذا التصرّف اللّي إذا دلّ على شيء فهو يدّل على وجود حالة وبائية من البهامة واللامبالاة ـ هو كي تجي تشوف المكثرية بهامة لكن تم ذكر "اللامبالاة" فقط لهزّان المورال ـ
يعني إنّو لا يزّي في تونس نعانيو في نقص المواهب السينمائية و هاذي حاجة ما نتلاموش عليها برشة على خاطر الموهبة هي حاجة ربانية و بارك الله في ما رزق....ـ لا محالة نجّموا نلوموا على عدم التأطير و تشجيع و دعم "السينما الصاعدة" سواء كانت افراداً او جماعات لكن هذا موش موضوعنا لهنا ـ و توة نزيدو نعانيوا في بهامة بعض المسؤلين اللّي حتّى كي يبدى ثمّة حاجة باهية يتحشالنا فيها من جرّاء بهامتهم.
و في الختام اقول أنّي قد قمت بالإشارة إلى ان البعض من اهل الإختصاص قد قاموا بالتعليق على هذا الموضوع و منهم الناقد السينمائي خميس الخياطي ـ لكني في اول المقال قلت "يدّهم" ـ اللّي قال لوكالة رويترز, الجمعة 28-11-2008 : "وجود فيلم مثل هذا لا علاقة له بما يحدث في غزة.. وهو أيضا ليس ضد تحرير فلسطين". و زاد قال أنه يعتقد أن المحرقة حدث تاريخي صحيح، "وعرض هذا الفيلم للمخرج اليهودي ميلر لا يعني أننا لا نساند الفلسطينيين، إنما يجب أن يبقى عملا سينمائيا في إطاره" و كلام الخياطي ما دخلش لمخّي حيث ان في هذا السياق كل شئ مربوط ببعضه البعض خاصة ان السينما هي من اهم النشاطات الثقافية و معروف ان النشاط الثقافي بانواعه هو مايعبر على مواقف المجتمع بكبيره و صغيره و اللي مازال يدبي على حصيره إذن لابد لهذا النشاط ان يكون مواكب للأحداث اللّي تصير في العالم واللّي تمسنا من بعيد او قريب ديجا كان باش تقيس مدى المواكبة متاعنا للأحداث عن طريق إستفتاء لأهم الأفلام عند التوانسة اتوّ يقولوا اللي نحنا مازلنا نافحين بإختراع الحمّام

إفهم وحدك....

في احد الايام الخوالي (ولت البارح) دارلي واحد من اصحابي قالّي "سمعت بالفضيحة متاع نانا ؟" قتلوا ما نعرفهاش تفجع!! و قعد يحكيلي عليها بطريقة طوبوغرافيّة: هاو عندها طلعة هنا و هبطة من غادي.... و مبعّد في آخر الحديث تفكر اللّي هي تغنّي..عاد بعد ما كمل درس الإروـ جغرافيا قتلو شنوة الفضيحة اللّي صارتلها قالّي : صاحبها نشر سيكونس فيديو فيها هي ويّاه في وضعيات لا نودك و لا نشهّيك ـ انا وقتها تفكّرت الّلي قريت حاجة كيما هكّة في الجريدة لكن ركّزت مع "فيلم جنسي" اكثر من إسم الفنانة.. ماو انا عربي كان ما فيبالكمش ;) ـ الحاصل تفكّرت اللّي الفازة هاذي مشهورة و برشة عملوها : باريس هيلتون , بريتني سبيرز... كل وحدة تعمل فيديو تبدى هي فيه مع شخص و تنشرو و مبعد تطلع في التلفزة و تبدى تبكي وتقول اللي تمّ التغرير بها و ما في بالهاش اللّي السّيد اللّي معاها نييتو قاعدة في ميحاض عربي و ديما الفيديوات هاذم يخرجوا و بعدهم تقوم الفنانة اللي تم التغرير بها بإنتاج فيلم ، كليب البوم جديد... معناها باينة اللّي هاذي مجرّد طريقة جديدة في الترويج للفنانات هاذم و لاحظو اللّي كلمة "ترويج" ما جاتش لهنا جُزافًا على خاطر الفنانات هاذم والفن او بمعنى اصحّ العفن اللّي يعملوا فيه عندو نفس التأثير اللّي عند المنتوجات الاخرى من منتوجات الكيف و لهنا نجمّو نستنتجو اللّي العباد اللي يقوموا بإنتاج و الترويج للفنانات هاذم هوما بمثابة زبراطة جدد وعلى رأسهم اكرز كرز العرب الوليد بن طلال صاحب شركة زبروتانا الرائدة في إنتاج هذا النوع مالمخضرِطات .
توة نرجعو لنانا و خنّار نانا انا مازلت ما تفرجتش في السيكونس و ما تفرّجتش زادة في واحد من كليباتها لكن وقتلي سألت صاحبي و قتلو إنتي وين ريت الجغرافيا متاع المذكورة آنفًا قالي "تفرجت في كليب متاعها"... يعني انّو السيكونس هاذي اللّي خرجت تتسمّى تطوّر منطقي و مرحلة متقدّمة في حياة وحدة من نوعية الاشخاص الّلي تنجّم تعمل دراسة معمّقة في اعماق الجغرافيا متاعهم كي تتفرّج في كيلب من الكليبات متاعهم. بون تبقى السيكونس هاذي كيما قلت قبل نوع من الاشهارات المبطنة و اللّي نجّموا نهار آخر نراو فيها واحد من المرشحين في إنتخابات رئاسية يقوم بالحملة الإنتخابية متاعو عن طريق تحميل وحدة " اللّي بالطبيعة باش تبقى الهويّة متاعها مجهولة" و يقوم بنشرها بلوتوثيّاً بين شباب العلا و خلاف هذا يمكن يرخّص في ثمن الهواتف الجوّالة اللّي يبدى فيها تقنية البلوتوث و يجعلها في متناول جميع االنّاس ـ اهوكة كي تجي تشري بورطابل من بوتيك عامل البروموسيون الإنتخابي يطلب عليك البيّاع بطاقة منخرط ـ باش يضمن إنتشار السيكونس و نجاح الحملة متاعو لكن الترخيص هذا ماهوش بلاش، اتو يزيدو في سوم التريسيتي او الماء او التريسيتي والماء و زادة يغلّيوا في سوم البتروليات و بالطبيعة حتّى كي يخلصو البورطابلوات الاسوام باش تبقى هي هي تدعيمًا للتوجّه المغلاوي للبلاد...
بالطبيعة كلو يوفى كان الق*ب الإعلامي ما يوفاش مادام برشة عباد مازالوا كي يتفرجو في التلفزة يحلوا عينيهم و يسكرو مخاخهم و كي يتفرّجوا في كليب متاع نانا و اخواتها اهوكة وذنيهم ديزاكتيفي... و لهنا نتفكّر كلمة متاع سمير الوافي : "صوت قبيح يمشي على سيقان جميلة".و انا ما نهضموش برشة سمير الوافي لكن...لمزيد من التفاصيل إنزل هنا


الإروـ جغرافيا : Ero-Geographie = Géographie érotique

نييتو قاعدة في ميحاض عربي : نييتو في وضعية القرفصاء, مڨعمزة





رقص على الوتر الحسّاس



في الايام المنصرمة ما لقيت ما نعمل و زيد الكوناكسيون مقصوصة و لهنا نتوجّهو بالشكر للّي كان السبب , مشيت باش نتفرّج في التلفزة و انا قاعد نبدّل في القنوات "الكثرة و قلّة البركة " تدعثرت في قناة "آل بي سي" المعروفة بالريادة في البرامج الميعة و المواخير الإعلامية و لقيت برنامج إسمو "هزي يا نواعم" يشبه لستار اكاديمي لكنو متاع شطيح انا ما قعدتش نتفرّج برشة و ما نعرفش التفاصيل الكل متاع هالبرنامج لكن باينة فرد سيستام : كمشة جوناس و جوري و كل واحد يعبر على طاقاتو و الحكّام يحددوا شكون الّلي حجّ و شكون اللّي عوّق و مادامنا نحكيو على السيستام ديما ثمة 3 في لجنة الحكّام : واحد باهي و حنون و واحد ساقط و ميـ*ون و الاخر مازال يلوّج على شخصيّة يتبناها...الحاصيلو بالحق غريبة في العباد اللّي تخمّم تعمل برامج هكّة و غريبة اكثر في العباد الّلي تتفرّج. و زعمة بعد هذا شنوة ما زالو باش يعملو ؟؟ زعمة يحلّوا "كاما سوترا اكاديمي" ؟ اهوكة بطبيعتهم عندهم الفروشات و الكاميروات و يعملوا اساتذة و كل واحد واختصاصو : كيفية اختيار البوزيسيون, تحديد مدى تناغم الأعضاء التناسلية و تحقيق اللحمة الكاملة بينها , الاصوات الّلي تتماشى مع كل حركة او حدث يصير خلال العملية... و بالطبيعة إذا كان ثمة شكون من الطلبة يحبّوا يدخلوا عالم الإحتراف اهوكةيقراو شوية علم المراودة على النفس و زيد يقراو طرف في علوم المال و الإقتصاد باش ما يعڨبوهاش عليهم و ما ياكلوهمش في عرقهم...نرجعوا لـهزي يا نواعم ,توة ستار اكاديمي و غيرها يوعدوا الطلبة متاعهم و الجمهور الّلي هوما باش يصنعوا نجوم جدد و باش يبدّلوا مفاهيم الفنّ و هذا صحيح ـ ديجا انا كتبت"هنا" كيفاش واحد كان يتعلّم في الغناء وو يهزّ البطولة على ظهر 15 كربي و مبعّد يولّي تاكسيست ـ و توّة ،زعمة اللّي باش تربح شنوة مستقبلها؟؟ باش يعملوا فيديو كليب كلّو شطيح؟ هو لا محالة بطبيعتهم اللّي يتفرجوا في الكليبات توّة كي تنقصلو في الصوت ما يحلبّش على خاطرو ماهوش لاهي بالغناء، معناها إنتشار النّوعية هاذي من الكليبات"النيو كليبيزم" ماهوش حاجة صعيبة برشة بل يمكن إعتبارها النهاية الطبيعية والمنطقية للفن في البلاد العربية كي نغزرو للمستوى اللّي وصلنالو توّة. و زعمة كيفاش يختارو شكون شطيحها خير؟ اللّي تتحكم في حزامها اكثر و إلاّ اللّي "سيكسي" اكثر؟ على خاطر من خلال تجربتي المتواضعة مع العروسات لاحظت اللّي البنات الّلي يقوموا يشطحوا ديما اكثريتهم ماهمش مزيانين برشة و اللّي تبدى مزيانة شطيحها يبدى رايض و ماهوش طيّارة برشة. يمكن هوما اللّي باش يحققوا الحلم العربي و يجيبو وحدة سكسي و شطاحة فرد وقت بون انا نعرف الّلي الغاية الاولى من البرنامج هي تبـزيل العباد هاتفيّا إذن بالطبيعة اللّي يرشقوا عليها اكثر تليفونات هي الّلي باش يقولولها "برة إنتي ناجحة" و بالطبيعة اي واحد عندو ثقافة بلوتوثية في عالم البورطابل يعرف السيكونس و يعرف لشكون يقولوها "برة إنتي ناجحة" و في اما ظروف بالضبط تتقال العبارة هاذيكة و توة اي واحد يطلع في التلفزة يقول اللّي عندو رسالة يحب يوصلها إذن شنوة الرسالة الّلي تنجّم توصل على يد رقاّصة محتملة ؟ لا محالة إذا كان ثمة رسالة باش توصل هي : "**** ليكم" و هي رسالة موجهة لكل العريبة قاطبة مادام العرب مازالو مقسمين لزوز انواع : نوع يخمم بترمتو و لاخر ما يخممش من اصلو

If Only I Had A Gun...







يضهرلي باين علاش (عبير صبري)









من روّاد البصّ الإعلامي (هالة سرحان)








بصّاص زادة لكن في دومان آخر ( عمرو خالد)







كيف كيف، بصّاص...(محمد الهاشمي.... )









بون هو ماهوش خايب كي يكتب امّا في حوار مع عبد...زيرو (سمير الوافي)









ناقصين نحنا تخلّف؟؟ (حسن الشارني)









خرى فيه بالـ... ( سعد الصغيّر )







زحّ ساعات يقول حاجات تضحّك لكن طريقتو في الكلام تعيّف....(سبوعي (نسيت إسمو))









و بالطبيعة ما نجمّش ننسى واحد من اكبر الاوباش الّلي عرفتهم


اه يا راسّي قدّاش تقاسي 2

باش نكمّل نحكي شوية على الحركات الطلابية :في النهارين هاذم معلقين تصويرة متاع واحد ملي يطلعو فوق طاولة و ييبدى : "يا زااامييلطيييي و يا زاامييلييي" (الترجمة في الاسفل) قالوا اللي السلطات شادّينو...ربّي معاه و كان الحكاية صحيحة يستاهل كل إحترام و إجلال، لكّن... انا نتفكّر في اوّل العام واقفين حضبة قدّام شبيبيك صغيّر باش ناخذو الكارطة و ما تابعها... و هو جاء يعارك شبيهم حالّين شبّاك واحد للحضبة هاذيكة , توّة هاذي حاجة باهية لكنو تبوهم ياسر: جاء يعارك بطريقة "عنيفة" معناها زاد عطّلنا اكثر و مبعّد زدم عليهم للبيرو ياخي سكّروا الشباك... توّة هو مادام تحشالهم الطلبة ورصاتلهم في شباك واحد ماو يستنّاهم لين يكمّلو و مبعّد يعمل الي يحبّ...اللهم هو قعد يستنّى لين تتلم حضبة باش يعمل الاحتجاج متاعو وقتها عاد تولّي حكاية اخرى...
توّة باش نحكي على حاجات اخرى من صنف ال " تسع مائة و سبعة بي" (الترجمة في الاسفل) ومالحاجات هاذي هوما الاشغال الي يعملو فيها توّة لا محالة انا مانيش ضد إصلاح الطرقات و جعلها "مَشْيَابِل" و بالطبيعة مانيش باش نعلّم القائمين على ها الاشغال صنعتهم لكن ثمّة برشة حكايات اي واحد عندو طرف ذكاء يفيق بيهم مثلاً يبداو الاشغال متاعهم مالصِّيف و يبداو من جهة الجامعة و اهوكة تنقص الغبابر و الفوضى و التعطيل على الطلبة... يمكن العمّال (ربّي يعينهم) كانو مصيٌفين و إلاّ ما يحملوش الشمس و ما ونجموا يبداوالخدمة كان معا القراية و مادام نحكيو على الوقت اللي بدات فيه الاشغال نجمو نخدمو مخاخنا شويّة على 2009 و على شنوّة باش يصير في 2009 .... لكن ا توّة مادامنا في شهر فضيل فكّ علينا مالمخبّل في كبّة.
نرجعو ل تكريز منّوبة: دوب ما تدخل للفاك باش تلاحظ وجود حيوانات ـ اليفة او غير اليفة هاذيكة حاجة مربوطة بزهرك ـ و ثمّة كلب يعرضك في اوّل الباب، هو الّلي لاهي بالريسيبسيون. الكلب هذا لونو وردي "روزز" يمكن هو الفرسيون التونسية لـ"بينك بانثر" و بالطبيعة
هو إكتسب اللّون هاذاكة مالجرب عافانا و عافاكم الله...باهي هاذم حيوانات ما يفهموا شيء مانلوموش عليهم برشة لكن ثمّة عفصة اخرى ياسر حلوّة : "المركّب الثقافي الرّياضي" بِالحق الفلوبّو متاع الثقافة و الرياضة فيه: الثقافة : فيه مركز طباعة "سنتر دو فوتوكوبي" و في السنتر هذا يبيعو الكتب الّلي نقراو بهم و خلاف هذا ثمّة نصبة متاع كتب لكن توّة نحّاوها,يمكن الشرطة البلدّية هدّت عليهم.... و بالنسبة للرياضة ثمّة "المشرب" (شنوّة العلاقة ؟ الله اعلم...) و خلف المشرب ثمّة "ڨونة" فيها انواع الفساد الكل:اللي يسيبوا في الكبت متاعهم،اللي عازڨين رمضان و غيرو من الاشهرالحرام، و ثمّة زادة بنات من فئة خاصّة يتكيّفوا غادي و مبعّد يخرجو للساحة الكبرى اللي فيها *** الانوار .... الحاسيلو حاجة بركة لقيتها عندها علاقة بالرياضة هي اللي ثمة برشة يتشعبطوا السورالتيلاني متاع الجامعة باش يجيو مباشرة في المطعم الجامعي او بعبارة اوضح : "الرّاستو" و خلّي عاد المطعم الجامعي هاذاكة مانيش باش نحكي عليه على خاطر مازلت ما نعرفوش و ما عينيش باش نعرفو..مازال برشة كلام يتقال على منّّوبة والعباد اللي في منّوبة و العباد الكل اون جينرال

الترجمة :
يا زااامييلطيييي و يا زاامييلييي:
* يا زميلتي و يا زميلي , اهوكة ياسر أنيق يسبّق "زاميلطو" على زميلو
تسع مائة و سبعة بي:
907b *



آه يا راسي قدّاش تقاسي

مالحاجات المميّزة بالفاك دي لاتر بمنّوبة و بايّ فاك دي لاتر اخرى هي المضاهرات و حركات الاحتجاج اللي قاعدة تتحرّك ضد النظام الحالي و اداواته كيما البوليس, بعض العملاء من الطلبة و الاساتذة.... المهم توّة انا لاحظت اللي يعملوا في الحكايات هاذي اكثريّتهم مالجنوب و إلاّ من داخل الجمهوريّة زعمة علاش؟؟ هذا الكل ولاد العاصمة بهايم و ماهمش فاهمين و ماهمش حاسين بالماء تحت صبابطهم اللي الكل شارينهم بمبلغ يتراوح بين 150 و 500 دينار و بالطبيعة الصبابط هاذم ما يتمسخوش مادام الكل بكراهبها... و إلاّ الكل ماهومش لاهين مادامنا الكل غاطسين في الشراب والسهرّيات غير البريئة...(مادامني متفكّر، ثمّة بيرّة جديدة قالو باهية في "العملاق"، "الحكّة" ب0.960 دينار تونسي)...نرجعوا لموضوعنا عاد مادام اغلبيّة زعماء الحركات الطلاّ بية ماهومش من تونس العاصمة يبداو يحكيو على حاجات برشة عباد و انا منهم ما يعرفوهمش بالرّغم اللي انا و هالبرشة عباد ماناش كل يوم "اون مود بامبيراب" مثلاً : انا امي مانتفكرهاش قامت مالنوم الخمسة متاع الصباح باش تحمي الطابونة , و الا انا كنت نسكن في "بضر عبلة" و نقرى في عضو آخر من اعضاءها الـحسّاسة و الا بعد ما نكمّل نقرى نمشي نسرح بالبقرات (مخيبها بالـ"ق")، الخ... معناها انا مانيش حاسّوا يحكي على مشاكل نعاني منها و خلاف هذا حتّى حد ما ينجم يلوم الدّولة على خاطر ما تولدش في جلغتو مغرفة ذهب وغيرها مالحاجات اللي ما عطاتهملوش الحياة الدّنيا او بالاصحّ ما ينجمش يلوم الدّولة على خاطرالزّمن عطاهولو،ثمّة جهات اخرى ينجّم يتعامل معاها
لامحالة يحكيو ساعات على حاجات صحاح لكن حاجات كلنّا نعرفوهم و ماناش مستحقّين لواحد يطلع فوق طاولة و يبدى يعيّط و يحكي عليهم... و خلاف هذا برشة منهم عندهم مستوى متاع كلام ياسر راقي و يواتي واحد يحكي على تصليح البلاد...منهم مرّة انا قاعد نعمل في سيقارو(مخيبها بالـ"ق" زادا) على واحد منهم و بنيّّة متعديّة قالت لصاحبتها : "زعمة بلحق اللي يحكيو فيه ؟" دارلها واحد مـ"الـفان كلوب" متاعو و قاللها : "مالا يكذب عليك يا قـ**ـة ؟" و مرّة واحد منهم يقول : اللي ماهوش يتبّع فيه وماهوش مؤمن بالرسالة متاعو هو انسان غافل و ماهوش فايقلها... و برشة عبارات تحمل بين طيّاتها معاني الغباء والبهامة ومشتقّاتهما... لكن بالطبيعة موش الكل منطقهم هكّة و موش هاذي المشكلة...و ثمّة كلام ديما يقولوه يكرّزني برشة ، يبداو يقارنو بين الطلبة قبل و توّة : قبل كان الطالب مايخافش و حربي و ياقف بوليس قدّامو يبدى يرعش ( البوليس يرعش موش الطالب)... لهنا تبان ثمّة مبالغة على خاطر قبل ما كانش ثمّة بوليسية من اصلو باش ياقف قدّامهم وحتّى الكعبات اللي ثمة لنّا و غادي متاع عندكشي عندي... لكّن توّة حسب ويكيبيديا ثمّة بين 80000 و130000 بوليس => افهم وحدك... و خلاف هذا قبل الطلبة كانوا شويّة معناها الحاكم كي يخمّم باش يعمللهم حاجة يعرف اللّي هو باش يترزى فيهم واي حاجة باش يعملها باش تتعرف و تتنشر و تراصيلّو في حل و اربط لكن توّة الطلبة قدّ شعر الرّاس و كي يطيحوا شعرتين والاّ ثلاثة ما يتحسّوش برشة
انا حبّيت نقول اللي انا كي نسمعهم نسمع جعجعةً و لا ارى طحنًا و ساعات نرى كان الطحين و نعرف اللّي هوما باش يبقاو هكّة لين تطلع الشمس مالغرب (معناها يجي نهار القيامة.. أهوكة فسّرتها في حالة ما إذا...) و حتّى لو كان الطلبة هاذم يشدو هوما البلاد بازز اتوّ يجيو عباد اخرين يعاودوا نفس الحكاية... و انا مانيش ضد هذا بالطبيعة لكن اللّي يحب يحكي و يقنع العباد بكلاموا لازمو يعرف كيفاش و على شنوّة يحكي...
الميضوع هذا باش يبقى ميزاجور مادامني نعاني في هاك الحفرة


Blah Blah

نتفكر مرّة موضوع انشاء : ذهبت الى الغابة للتنزه فاعترضتك عدة عراقيل...تحدث
واحد كتب : في الصباح الباكر ذهبت للغابة للتنزه فآعترضني عُرقول
...

3ar Academy

thamma 7aja yesser ena nkaraz menha w mana3rch 3lèch el3bèdd maghrouma biha : Star Academy : tawa hiya normalmn 3afsa bech n5arjou biha 3bèdd 9wiya fil ghnè w yjibou data7el ezzik w ya3mlou majèlis tarabiya w vocalise w ri9 m3a9ed... mé meli bdètt starac 7attèkchi ltawa eli reb7ou elkol 7atta 7ad fihom ma3mal 7aja tasla7 fil ghnè : Med attiya 3mal clip matefhem menou chay yesser action fih w rythme mta3 el ghnè yesser rapide 7asilou matasma3ch soutou w deja howa meloul ken el clown fi starac w dima yetkoumek "احمق القرية" w mba3ed 3mal film walla 2 aflèm el7a9 ta3 rabi matfarajtch fihom mé bèynin m3aftinn w 7kèwli 3lih comkoi rja3 mel passé bech y3awed yrabbi wlèdou ... ewww
we hichèm el saoudien eli rbe7 ba3dou mana3rch 3lih ken yet3alem fil ghnè walla y3adi fi permi de place... 7assilou ba3d elstar-academication hèdhèka elkol mchè 3mal emission mta3 taxiste w kol mara yas2al m5ali9 rabbi 3la a7wèlhom w haw tawa chèdd emission fil mbc fiha snade9 w wa7ed ya5tar dra chnwa w drachkoun y3awen fih...7assilou emission o5ra mta3 *** 3acha3b deja kothrou houma kilbatata chaq 3 mois tatla3 emission jdida w kil3ada el3bèd tebda ettaba3 b 7amèss w tab3ath fil sms 3la 7sèb 6 w elbattala fil 9hawi ymaniw fi rwe7hom bech yjiw fi blasset eli yal3ab w yebda mafjou3 akther menou..pfff tawa thamma 3ala9al des emission kima waznek dhahab w e5er 9arar w ki veut gagner des millions fihom tarf majhoud ya3mlou elwa7ed bech yerbe7 mé tawa juste yab9a 9a3ed w ya7ki tarf 3la teri55 7yètou et apres howa w zahrou rbe7 walla 5ser... narj3ou l ri9 starac g remarké eli dima mel nominé thama wa7ed 5aliji.. bèyna el faza y7ebou ybazlou el5alij "telephonikemn" ( dsl 3alkilma ena bidi nakraha mé mal9itch terme plus specifik) w biensur dima yamna3 bech y3awed yti77 nominé ejem3a eli ba3d'ha w dima laflèm ki wa7ed yamne3 mel tatridd tal9aha elkol tebki w eljomhour ysafa9 tkounch 3lina 3awedna fta7na el andalus mara o5ra... elmohom tawa ena yodherli el3bèd y7ebou Star Academy kima 9bal ki 7bou BigBrother w Loft story w ghirhom mel télé-réalité... bel3arbi la yhemhom fil ghnè w la fi mosta9bel el zik el3arabi juste y7ebou ychab3ou 7obb etnasniss mta3hom : 16 tofla w tfol wa7ad'hom fi dar w hèdhi 7abbet le5er w sesmou 7abb lo5ra w hèdhèka tnèbezz m3a le5er 3la 5atrou g7err l bent blèdou... 7assilou prostitution de chèvres...

Kill Your God , Kill Your TV..

9bal kol chay el titre me5dhou men chanson de Marilyn Manson bon ena j'aime pa ce ma5lou9 mé sa3at yonte9 7ajèt s7a7 ti elmohom...kol manemchi lel salon n9oul nrata7 3iniya mel pc w nta3abhom bel TV nendem n9oul èchmraja3ni l ha erbatt : biensur doub mano93ed lazem nestana eli yetfaraj ykamal el forja mta3ou et apres ne5ou ena ma9alid el7okm 7assilou barcha marrat nal9a ommi tetfaraj et biensur dima 7atta iqra w ennès wel 7ikma.... tebda el fdhaye77 :
-ab3ath sms yanoubek ajr mina ellèh ab3ath sms youkalifouka el9alil w yorbi7ouka el kathir etc...w faza o5ra tab3ath sms allahou a3lem 9adèch ykalfek w 9adèch tab9a testana w bech tjik sonnerie fiha adhèn walla tasbi7... ma3nèha ena najam nebda fi el toilette w wa7ed ya3meli appel w yebda el prtble yedhen w illa ysabe7? ma7lèni ena fil wadh3iya hèdhika wena insèn 7assèss ki nasma3 ladhènn nwali nebki w n5amam ma3nèha hèdhi forsa liya bech na3mel i3tikèf fil toilette... w za3ma kol mayotlebna 3abd w illa yjina msg rabi yektebhomlna 7assanèt ? w 3al 7ssèb hèdha atw nod5lou elkol lel janna alors za3ma tet9assem el janna? hèdhom jme3et el telecom w hèdhom jme3et el tunisiana ? 7assilou 5oumadha kalba
- thamma momathla masriya esm'ha 3abir sabri 7assilou kènet icone fil tmalhitt mé tawa tèbb 3liha rabi w lebsset el voile mé ki tatla3 fil TV -deja 3andha emission fi Iqraa w kenet dima tjib'ha hèla sar7an fi rotana- tebda lèbssa lalwèn elkol a7mar,a5dher,azre9.... 3la kol loun ya 9at3a w menghir mana7ki 3la wej'ha 3la 5ater ltawa lanajamt ne7seb 9adèch fih men lounn w tebda ra9bet'ha bèyna w ma bèn kèn a3dhem w tebda 3amla manucure w kol mara 3iniha lounn a part ena mara rit'ha lebssa jeba rose nes5aylha meloul 3èryèna w dèhna rou7a bel rose 7assilou chay ywa9af elmo55 w ywagaff 7aja o5ra :p w ghriba elli yebda m3aha wa7ed kèsse7 fi eddin w tebda hayyyyyyyyyy ela7ya w ya7kiw 3al النساء المتبرجات w ya7kiw 3la chourout elibsa el islmaiya lelnsè 7assilou klèm kol 7achw... ti as7abi elbnèt el hreddes yetsamèw astar menha b 100 marra 300 maryoul men fou9 w jupe w serwèll w converse lelrokba w kolhom fil ak7al.. ahwka y5aybou fi rwe7hom bech yna9sou mel fitna ...w thamma barcha kif'ha kima Souhir ElBèbli tawa hiya voilé w meddayna w 3amla mousalsal fih faza weld'ha mètt fi 7jer'ha !! ti kifèch hiya meddayna w yji 3azlouk 3omrou 30 ans yarmi rassou ghadi?? w thama barcha kif'ha ye7chiw fih fig mé ena maghalbett 3liya kèn abir sabri eli mazelt icone fi etmalhit ama chnwa tmalhit voilé
- thamma insèn yesser... wallahi mal9itch adj ya3tih 7a9ou esmou 3amr 5aled 7assilou la3eb fiha ja3b eddin w dima you3ed fina (3andou plus ke 5 ans tawa) eli howa bech y3awen echabèb w bech y5araj generation jdida kolha imèn w ta9wa w far7an bechlèghmou ( bèyn mazel mablagh'ch deja la7itou mazelt matal3atch w soutou mazel jouway'd) 7asilou kol manetfaraj fih (biensur مكره اخاك لا بطل )yebda el cameraman mrakaz 3la wa7da mèzyèna 3aynèha ba7r fi yawm ri77 w yebda 3ad yansa7 fina w ywassi w y3awed w yjib fil addila w ela7adith eli lazemna nod5lou lel toilette belissar w no5rjou belimin... w illa yebda ya7kilna 3la nèss bekri kifèch kènou...7assilou el3erwi b'kollou maygeddouch w klèmou mayanfa3 l chay juste yab9a ya7ki wakahaw w kolhom 7kyètt ma3roufin w file5er yebda yed3i w ya3ssar fi 3inih w wrass ommi la nhar ritou habbat dam3a wa7da... et biensur mba3d yemchi yejri 3al cachet mta3ou w ma7lèh wa7ed la3eb fiha 9odwa lel chabèb w yebda y3arek 3la soum el7adith w soum el èya... eda3wa b 5 g'nih wel 7assèba bte7seb kima 9all adel imèm
- thamma barcha baramej mta3 fatèwi w yjib wa7ed walla wa7da w yebda ysayab fil 3ilm mta3ou. mara fi chanel elme7war thamma barnèmej esmou" عم يتسآلون"
3amlin 7al9a special +18 w ya7kiw kifèch errajel lazmou yetsaraf fil farch m3a martou !!! bellèhi 9oulouli chkoun yfakar fil 7lèl wel7ram wa9t'ha ? ti chnwa 7lwètha idha ken wa7ed yebda yfakar men aslou fil wa9tt hèdhèka ? w nofrdhou elli el pénétration anale 7lèl chkoun eli tardha bech ta3ml'ha ? deja thamma chkoun b3ath e-mail yas2al fih 3la 7okm el fellation (chicha l7am) ye5i jèwbetou el Dr sou3ad sale7 w 9allet: لم يرد حكم بذلك => elchicha 7lèl mou7alel mé chkoun elmra elli tardha tahbet chicha w 7atta ken thamma nsè ya3mlouha (rabi ykather men amthèlhom lol) mahomch bech y5ammou fiha 7lèl walla 7ram w kolna na3rfou elli el relation bin elmra werrajel to7kem fiha ken 7aja wa7da : juste el3abd mayebdèch go3rr wakahw... w menghir mankamal na7ki 3la elas2la elm3afta wel ajwèba elm3aftin akther : mahowa 7okm ennadhar ila 3odhw ezzawj? , mahowa 7okm libèss esserwèl el5ayti (string) ? mahowa 7okm elmou3achra fi makèn ghayr el baytt ??........ 7assilou chay yonfe5
-a9wa 7kèya sm3at'ha 5arjet mel jame3 el Az'har wa7ed mal9a maya3mel 9all elli el7all mta3 el5olwa howa inou elmra tradhe3 errajel eli m3aha => wa7ed ommou mridha lazemha infirmier m3aha lazemha tradh3ou bech ywali fi m9am weld'ha w illa mra bech terkeb fi taxi lazemha tradhe3 el chaufeur bech matet9ayadch 3liha 5olwa w ensè eli ye5dmou fi societé m3a rjèl fard bit kifkif.... ma3nèha meli konna harbin mel 5olwa to7na fi eznè
7assilou chay bel7a9 yonfe5 erass kol wa7ed yatla3 fil TV ya3mel islèm 3la zay rassou... alors kill your god kill your TV