اه يا راسّي قدّاش تقاسي 2

باش نكمّل نحكي شوية على الحركات الطلابية :في النهارين هاذم معلقين تصويرة متاع واحد ملي يطلعو فوق طاولة و ييبدى : "يا زااامييلطيييي و يا زاامييلييي" (الترجمة في الاسفل) قالوا اللي السلطات شادّينو...ربّي معاه و كان الحكاية صحيحة يستاهل كل إحترام و إجلال، لكّن... انا نتفكّر في اوّل العام واقفين حضبة قدّام شبيبيك صغيّر باش ناخذو الكارطة و ما تابعها... و هو جاء يعارك شبيهم حالّين شبّاك واحد للحضبة هاذيكة , توّة هاذي حاجة باهية لكنو تبوهم ياسر: جاء يعارك بطريقة "عنيفة" معناها زاد عطّلنا اكثر و مبعّد زدم عليهم للبيرو ياخي سكّروا الشباك... توّة هو مادام تحشالهم الطلبة ورصاتلهم في شباك واحد ماو يستنّاهم لين يكمّلو و مبعّد يعمل الي يحبّ...اللهم هو قعد يستنّى لين تتلم حضبة باش يعمل الاحتجاج متاعو وقتها عاد تولّي حكاية اخرى...
توّة باش نحكي على حاجات اخرى من صنف ال " تسع مائة و سبعة بي" (الترجمة في الاسفل) ومالحاجات هاذي هوما الاشغال الي يعملو فيها توّة لا محالة انا مانيش ضد إصلاح الطرقات و جعلها "مَشْيَابِل" و بالطبيعة مانيش باش نعلّم القائمين على ها الاشغال صنعتهم لكن ثمّة برشة حكايات اي واحد عندو طرف ذكاء يفيق بيهم مثلاً يبداو الاشغال متاعهم مالصِّيف و يبداو من جهة الجامعة و اهوكة تنقص الغبابر و الفوضى و التعطيل على الطلبة... يمكن العمّال (ربّي يعينهم) كانو مصيٌفين و إلاّ ما يحملوش الشمس و ما ونجموا يبداوالخدمة كان معا القراية و مادام نحكيو على الوقت اللي بدات فيه الاشغال نجمو نخدمو مخاخنا شويّة على 2009 و على شنوّة باش يصير في 2009 .... لكن ا توّة مادامنا في شهر فضيل فكّ علينا مالمخبّل في كبّة.
نرجعو ل تكريز منّوبة: دوب ما تدخل للفاك باش تلاحظ وجود حيوانات ـ اليفة او غير اليفة هاذيكة حاجة مربوطة بزهرك ـ و ثمّة كلب يعرضك في اوّل الباب، هو الّلي لاهي بالريسيبسيون. الكلب هذا لونو وردي "روزز" يمكن هو الفرسيون التونسية لـ"بينك بانثر" و بالطبيعة هو إكتسب اللّون هاذاكة مالجرب عافانا و عافاكم الله...باهي هاذم حيوانات ما يفهموا شيء مانلوموش عليهم برشة لكن ثمّة عفصة اخرى ياسر حلوّة : "المركّب الثقافي الرّياضي" بِالحق الفلوبّو متاع الثقافة و الرياضة فيه: الثقافة : فيه مركز طباعة "سنتر دو فوتوكوبي" و في السنتر هذا يبيعو الكتب الّلي نقراو بهم و خلاف هذا ثمّة نصبة متاع كتب لكن توّة نحّاوها,يمكن الشرطة البلدّية هدّت عليهم.... و بالنسبة للرياضة ثمّة "المشرب" (شنوّة العلاقة ؟ الله اعلم...) و خلف المشرب ثمّة "ڨونة" فيها انواع الفساد الكل:اللي يسيبوا في الكبت متاعهم،اللي عازڨين رمضان و غيرو من الاشهرالحرام، و ثمّة زادة بنات من فئة خاصّة يتكيّفوا غادي و مبعّد يخرجو للساحة الكبرى اللي فيها *** الانوار .... الحاسيلو حاجة بركة لقيتها عندها علاقة بالرياضة هي اللي ثمة برشة يتشعبطوا السورالتيلاني متاع الجامعة باش يجيو مباشرة في المطعم الجامعي او بعبارة اوضح : "الرّاستو" و خلّي عاد المطعم الجامعي هاذاكة مانيش باش نحكي عليه على خاطر مازلت ما نعرفوش و ما عينيش باش نعرفو..مازال برشة كلام يتقال على منّّوبة والعباد اللي في منّوبة و العباد الكل اون جينرال

الترجمة :
يا زااامييلطيييي و يا زاامييلييي:
* يا زميلتي و يا زميلي , اهوكة ياسر أنيق يسبّق "زاميلطو" على زميلو
تسع مائة و سبعة بي:
907b *