الـخـصّـاؤون 3

كنت تناولت في تدوينين سابقتين(هنا و هنا) بعض الاشخاص او بالاصح بعض الجوانب من شخصيات بعض الاشخاص اللي تنفخهملك إلى حد التفرڨيع, و تبدى في قرارة نفسك تحب تقول للعبد بكل تربية و إحترام :" بـرّا يـلـعـن ديـ******** الـوقـت و الـصـدفـة الـ**** الـلـي طـيـحـتـنـي بـيـك" و تتمنى - و في نطاق اللعبة اللي لعبناها في البلوغسفير- انو يجيك واحد ولد حلال و يعطيك كادو يتمثل في فرد مشرجي حاضر باش و في بعض الحالات سكّينة حافية و معاها ترخيص بالقتل...
يمكن انا نبان نبالغ شوية, خاصة وان بعض الفازات تبان عادية عند الكثيرين. لكن يبدو انو اللي خلاها عند العباد نورمال ، جا عندي و وقف, و خلاني نعاني من نوبات تكريز عنيفة توصلني إلى ما لا يحمد عقباه من دوانة مع العباد و في بعض الحالات دوانة مع روحي.

المهم ، من العباد اللي توترلي اعصابي هوما اللي مغرومين بالسوسبانس, ويتحوّل اقل حوار بيناتنا إلى فيلم ما نعرفش الخاتمة متاعو... حيث يلمحلي مللول اللي عندو حكاية او فيشة تهمني، لكن يمرج باش يقولها و يبدى يتجبد عليا كيف اللاستيك - مع كل إحترامي للاستيك وغيرو من ادوات اللي عاونتني باش ناخو بثاري , من بعيد, كي كنت طفل بريء-.. الحاصل ما تعرف شنوة الحكاية كان بطلوع الروح او وقتلي توصل الامور لمواصلها و غالبا ما تكون الحكاية ماسطة لاسطة و ما عندها حتى اهمية...
يمكن هي مجرد طبيعة إنسانية لا اكثر و لا اقل, و يمكن هو يحب يهز المورال لروحو بتحسيسك و تحسيس نفسو انو عامل عليك مزية كي حكالك الفازة... المهم انها صنعة مُـكْرزة من الوريد إلى الوريد.
و كذلك ثمة شكون كيفهم لكني نسبْهم بدرجة اقل, هوما بعض الكونطاكوات في الـ"MSN" و اشباهه من برامج. حيث يجيك واحد من هؤلاء الكونطاكوات و يقلك : " اسمعني"... لكن ما يكمّل الهدرة كان كي تجاوبو و تقلو "شنوة؟".... و كي تعاركهم , يبررو هذا التصرف المقيت بانهم يحبو يثبْتو انك موجود او لا... لكن مادام جاوبتك كي قتلي "slt" معناها انا موجود ! و زيد من فوق انا باش نراه كلامك بطريقة او باخرى, حيث في الـ"MSN" و عكس بعض المجالات الاخرى ما يضيع شي وما تخافش لا كلامك يمشي في النافخات زمرا...

ثمة نوع اخر زادة يعرف من اين تنفخ الخصية و يمكن هوما زادة يتشاركو مع النوع المذكور اعلاه في فازة هزان المورال لرواحهم. حيث يضيف بعض الكلمات او يتكلم بطريقة معينة باش يرد الحكاية الفارغة اللي باش يعملها حاجة كبيرة و حدث عظيم لازم الكل يحسّو بالاهمية متاعو... فمثلا ,و هاذي فازة صارتلي عندها بضع ساعات, جاني "صديق" مُـرْزن و مُـكْرز و مُـنْفخ سواء في الـ"MSN" او الدنيا, قالي بعد حوار لا تنقصه الفـدة انو "بـاش يـحـضّـر الـفـورمـاطـاج"... و بحكم معرفتي الوثيقة بالبيت متاعو كيفاش نظامها، نعرف اللي السي دي متاع الوندوز و و سي دي الدرايفر محطوطين في قجر بجنب الكومبيوتر... يعني تحضيرو يتمثل في مدان يديه للقجر و جبدان السي دي و ينزل على الفلسة باش يحل الباب متاع الـ "lecteur" و بعد المجهود هذا كله باش يحط السي دي و يريديماري الـ "PC"...
و انا ريت برشة من النوع هذا حيث فيهم شكون يبشر الناس الكل اللي هو باش يعطيها "سـلْـتـة" سواء في الوجه او الراس او تلقاه فخور و يمشي باكتافو على خاطر و باش يمشي للحمام باش يعمل طياب... و طبعا لا يمكن تتليف الحدث الاكبر المتمثل في انو عمل فازة من الفازات متاع تيليكوم او تونيزيانا و باش يبات ليلة كاملة يمارس في العشق اللفظي...

و ثمة ستيل اخر متاع حديث يفدد، حيث يستانس احدهم انو يقلك حاجة موش لازم يقولها من اصلو. مثلا كي تجي المحطة الي باش تهبطو فيها من الميترو او الكار، يقلك "ايا حضر روحك باش تهبط"... تكونش عليك باش تلبس "parachute" باش تنجم تهبط (بون ساعات نستحقوها بالحق في الكار). او كي يلزّك الجوع و تشريو ماكلة ، كي يجيك صحنك او كسكروتك يقلك "ايا إبدى كول" و غيرو من التوجيهات الدالة على بعض الامور البديهية اللي ما تستحقش حتى مجرد الاشارة إليها لين ساعات تقول بالكشي يسخايل عندك الزهايمر و ما تعرفش شنوة العلاقة بين تغرويط كرشك و الماكلة اللي قدامك....و زادة يقلك ساعات " قوم اغسل يديك" (لا محالة ثمة شكون لازم تفكرو او بالاحرى تحشمو باش يغسل يديه) و "ايا خلّص الراجل",و غيرهم... ديجا هذه الاخيرة تفددني برشة حيث نحس انو الجيرون باش يشك في كوني قلاّب...
النوع هذا من العباد يبانلي و كأنو يحاول و في يأس انو يحس بقيمتو في مجرى الاحداث اليومية و ان وجودو مهم في الحياة و خاصة في حياتك انت، لكن هــــــــيــــــــــهـــــــــــــــات...."

و زادة ثمة شكون يستعمل لوغة ماسطة, تنرفزني إلى اقصى حد يمكن تصورو, كي يبدى يعبر على عدم إعجابو بحاجة إنتي عملتها او تحبها. حيث يجي واحد من ها النوع و يغزرلك بشطر عين و يعوج فمّو و يقلك "شو شنوة لابسلي" او" شنوة ها الفن الي تسمعلي فيه" و غيرو من الافعال الي يصرّفها بطريقة تبين و كأنها عندها علاقة مباشرة بيه... و كأنو وجودك إنتي و حياتك إنتي عندهم علاقة بيه توصل إلى حد يجعلك مسؤول امامو و لازمك تبررلو مواقفك و حوايجك و كمية الجال اللي في شعرك.... و هاذم انا نتعرضلهم برشة في حياتي اليومية خاصة كي واحد يقلي انو يحب يسمع معايا طرف فـن في الـ" MP "...

طبعا هذا غيض من فيض، فالعباد اللي تفدد و تطيرلك الشاهية من الإنسانية (طبعا مانيش مستثني روحي) منتشرين برشة و لو كان جينا ننتجو فيهم رانا خير من اليابان توة... اما ناس بكري قالو كلمة باهية: "حمورية في الوجه و لا غصة في القلب.." لذلك فإني غالبا ما نطرشق ديراكت في وجه هؤلاء باقذع ما يوحى لي من الفاظ فسيئة و اساليب رذيلة في التمزبيل, واللي يخلي الحكاية اسهل هو غياب اي نوع من انواع الحمورية في وجهي سواء بالمعنى الحرفي او الرمزي لكلمة "حمورية".حيث ما نعانيش من اي نوع من انواع الاثار الجانبية لنوبة التمزبيل اللي جاتني و نعبر على راحتي عما يخالج نفسي من بغضاء و شحناء ...