زبراطولوجيا


قبيلة نتفرج في برنامج إسمو " Brainiac " و يعنيو بيها "المهووسين بالعلم" و كل مرة يعملو تجربة سخيفة نوعًا ما: هاو وقفو على عضمة و هي في وضعية عمودية باش يشوفوها تتكسّر و إلاّ لا, عملو سباق بين موتور و صاروخ... و تفاهات من هذا القبيل. لكن عملوا تجربة على حاجة تهم كل أعضاء حزب الدّيك خاصّة و ان الريفيون على الأبواب.و التجربة هاذي الغاية منها تحديد احسن علاج لأثار ما بعد الثمالة
اللي تتمثل في جفاف الفم و ذلك لأن الكحول تنقّص في نسبة السوائل في الجسم خلاف اللي هي مدرّة للبول (حاشاكم) كذلك ثمة الوجاعة متاع الكرش من جرة فقدان المعدة للانزيمات متاعها و بالطبيعة وجاعة الرّاس.
هو لا محالة أحسن دواء الواحد ما يكثرّش من أصلو لكن بما أنّو ساعات الشيخة تحكم و القعدة تحلى قامت المجموعة هاذي من الـBrainiac بالتجربة حيث بلعوه ڨنّوط بإسم العلم و في الصباح كي قامو قسّموهم لثلاث مجموعات :
المجموعة A : شربت دوايات متاع وجاعة و فيتامينات
المجموعة B : كلات فطور إنڨليزي تقليدي ( مقلي)
المجموعة C : إستوحاو طريقة العلاج من أبو نوّاس "داويني باللتي كانت هي الداء" و زادو شربوا دوزات خفاف عالصباح
و بعد مرور بضع ساعات سجلت المجموعة B تحسن ملحوظ مقارنة بالمجموعات الأخرى حيث نقصت التكوخيرة و رجعو في حيوية و نشاط... إذن نصيحة لكل الناوين على بلعة راس العام : يحضرو صحيّن كفتاجي بالكبدة و ياكلوه على الخوا لتفادي تمضية نهار اڨزح في اوّل نهار في العام الجديد او في أي نهار يعقب مناسبة تستوجب الإحتفال بالڨزاز و أخواتو...

هناك 5 تعليقات:

  1. غير معرف21/12/08 08:36

    ضربتلي عالوتر الحساس
    تكوخير و راس يوجع و من بكري و انا نشرب في الماء
    اما ماعملتش مقلي , جيست كسكروت بالهريسه و السلامي ... اما قول الشي ما يبعدش على بعضو

    ردحذف
  2. غير معرف21/12/08 10:51

    ايا مرحبا بيك في عالم الكحول و التزبريط و يعطك الصحة على هالمدونة الدلولة.
    براف:
    بصفتي ذي باع و ذراع في ميدان الالكول وكل ماهو قابل للالتهاب هاو نعطيك نصيحة مجرررررب و سيب عليك بلا تخلويض:قبل ماترقد حاول تعبي كرشك بالماء ويوفا الحب.خاطر الكحول يشيح المخ وهو مايسبب '' فم اللوح '' او الثملة لذا لازمك تقرعط الماء.
    فانتظار انو تكون لنا محادثات تحت عنبية قادمة
    نهار سعيد

    ردحذف
  3. @Arschloch: هو كي تجي تشوف سبب البلعة هو اللي يحكم يعني تنجم تكون التكوخيرة كيما "تكوخيرة العرس" البدن يوجع و القلب فرحان و تنجّم تكون تكوخيرة متاع طريحة نبّاش القبور...
    @ زبراط : إحقاقًا للحق مانيش زبراطولوڨ كبير لكن جربت شربان الماء برشة و حسّيت بتحسن لكن عديت ليلة كاملة و انا ماشي جاي على الـW.C...بون زيادة الدواء ما فيها ندامة : عالصّباح مقلي و دبوزة ماء و الفايدة في تحصيل النامّوسة و التكوخير اتو يتنحى عاجلا او آجلا

    ردحذف
  4. غير معرف22/12/08 17:23

    كوكا ... كوكا.... كوكا... وأجهش بالبكاء

    ردحذف
  5. لا يبكينا عليها و لا يحرمنا منها...

    ردحذف

علّق على ما خلطْ... و بالطبيعة أيّ تعليق يحتوي على عبارات منافية للأخلاق الحميدة او منافية لأي نوع آخر من الأخلاق سيتمّ محْقُه...وشكرًا

Je traduis :

5alli commentaire(s) 3la ma 5latt et biensur ay commentaire(s) mouch bèhi yetfasa5...merci