إنجاز يفرهد

في الأيام هاذي كل ما نطيح بمادّة إخبارية سواء كانت مقرؤة او مسموعة يجيني إحساس بالجوجمة و التكريز العاطي شوية على الكآبَة : إمتحان سياسي باش ندوبلو فيه للمرّة الرّابعة ـ المرّة الأولى ما تتحسبش بالطبيعةـ و يمكن ثمّة دوبيلة خامسة و سادسة إلاّ إذا كان عزرائيل او أحد مندوبيه ياخذ موقف...، الأحداث الصايرة في الحوض المنجمي و تجلّي الديمقراطية في احلى حللها القزوردية...، الحادثة المؤسفة متاع بوش و الصبّاط "المنتظر" و انا قلت مؤسفة على خاطر ما جاش فيه لكن حتّى لو كان خطفت فيه حتّى شئ ما يتبدّل اللّهم يولّي الفيديو يضحّك اكثر...، الإقتصاد العالمي ماكل كبّوط و إنتشار الأزمة و كل يوم خبر جديد على شركة تفلس و معمل يسكّر...هو لا محالة برشة قالوا اللّي الأزمة خاطيتنا لكن توة ماعادش تصدق حتّى حد...، حصار غزة و عجز الكرب على تقديم المساعدة اللاّزمة من دواء و غذاء و فوق هذا يجي كلب الأزهر يسلّم على بيريز و يستعمل حجج كي وجهو لتبرير ذلك و لهنا في تونس يعديو فيلم يدافع على اليهود و يطالب بالتعاطف معاهم بسبب المحرقة المشكوك حتّى في وجودها..، و خلاف الأحداث اليومية في بلادنا اللي نقراهم في الجرايد من نوع نضرة، فڨحرة، فتشوحيرة، فسبّة، فعركة، فدغرة، فدفينة... و زيدهم الأخبار على الزيادة في الأسعار و النقص في كميّة الدراشنوّة...
لكن البارح نقرى في جريدة لقيت خبر يفرّح شوية في وسط الخوماضة هاذي و هو إكتشاف دواء للبرص على يد دكتور تونسي علما و ان البرص تبلغ نسبة الإصابة بيه 2% عالميا و زادة يوجد في تونس 200 الف مريض بيه و باش يقوم الدكتور هذا و إسمو رشاد صميدة بتسجيل براءة الإختراع في الأيام القادمة. بون مانيش باش ندخل في التفاصيل متاع الإكتشاف لعدم توفر وسع البال لكتابة أسامي العقاقر و المواد المستعملة، لكن حسب الجريدة تمّ إثبات نجاعة العلاج هذا اللي يمتد على عامين و قالوا زادة اللّي ثمة شكون بدى يتحسن بعد 4 اشهر فقط من العلاج. توة انا ما عندي حتى علاقة بالبرص من بعيد او قريب لكن الواحد يفرح كي يلقى إنجاز تونسي في مجال كيما هذا. برجولية انا كرّزت من الإنجازات متاعنا المتمثلة في اكبر قصعة كسكسي و اكبر كاس سيتروناد و اطول كعبة ڨاطو...و كل إنجاز عندو علاقة بالنشاطات الهضمية للإنسان. ديجا ثمة حكيم قديم لكنو مازال حي قال: "من كان همّه (او بالأحرى إنجازاته) في بطنه، كانت قيمته ما يخرج منها" و من هنا نجموا نستخلصو شنوة قيمة إنجازاتنا و قيمة اللي انجزوها في نظر أي واحد عندو مخ و اوّلهم جماعة Guinness اللي نمشيو نجريولهم و نفرّحو فيهم بإنجازاتنا المتقدمة للخلف اللي هوما بالطبيعة يعرفو اللي قيمة أي شعب تتمثل في إنجازاتو اللي يفتخر بيها إذن هوما مقتنعين اللي قيمتنا....
الحاصل أنا فرهدني شوية الخبر هذا لكن نظرًا للطبيعة التشاؤمية متاعي نعرف اللي باش تتعدى مدّة طويلة قبل ما نقرى حاجة أخرى من النوع هذا...

هناك 3 تعليقات:

  1. غير معرف22/12/08 14:58

    en supposant que l'info est vraie puisque tu l as lu dans un journal Tunisien

    ردحذف
  2. الخبر قريتو في جريدة "الأخبار" ,العدد 1286 ء من الخميس 18 إلى الاربعاء 24 ديسمبر 2008

    ردحذف
  3. غير معرف15/2/10 08:57

    نظرة تشاؤمية نشوفها من خلال ردك ومفردات هبلتني ضحك لكن نقول ونرجع الي الخبر صحيح والطبيب موجود والدواء مستحضر زيتي لعلاج مرضى البهاق إن شاء الله يرى النور قريبا ويقطع دابر هذا المرض

    ردحذف

علّق على ما خلطْ... و بالطبيعة أيّ تعليق يحتوي على عبارات منافية للأخلاق الحميدة او منافية لأي نوع آخر من الأخلاق سيتمّ محْقُه...وشكرًا

Je traduis :

5alli commentaire(s) 3la ma 5latt et biensur ay commentaire(s) mouch bèhi yetfasa5...merci