نوبة نوسطالجية

البارح في القهوة و بعد ما كملنا حكينا على كل المواضيع اللي يمكن لشباب في العشرينات يحكي عليهم : العرك ، الكورة ، البنات، بعض المواضيع الجادة (سياسية، إقتصادية، دينية....) اللي يتم تناولها بتفاهة مدقعة - تتجلى هذه التفاهة في طريقة طرح المشكل و كذلك في الحلول - و غيرها من المواضيع... جبدنا موضوع الماضي و حكايات متاع الصغر (تلقاه اللاوعي بلعاني حكم علينا نجبدو الهدرة هاذي باش نبانوا كبار قدام رواحنا و الله و فرويد اعلم...)
المهم بعد ما حكينا عالعرك متاع الصغر و التاريخ متاع الكورة و كذلك البنات اللي عرفناهم في صغرنا...(الحكايات هوما بيدهم في الاوقات الكل...) جبدنا نحكيو عالقراية و المعلم الفولاني و المديرالخايب و العسّاس الرجولي... و
طاح كل واحد يشكر في المادة الي يحبها من الصغرة و لاخر يشكر في المعلم اللي قرّاه في السنة الرابعة إبتدائي وكذلك اللي يسب في النهار اللي شاف فيه الاستاذ الفولاني...

لكن انا تفكرت نص قريتو عام النوفيام و كان من اروع النصوص الي قريتها في الوقت هذاكة حيث عرفت المتعة متاع واحد يغزر للمجتمع متاعو من بعيد و يبقى يلاحظ في الديفوات متاعو و مظاهر العوج اللي فيه... عاد قعدت نحكي عليه و عملت تلخيص ليه في القهوة لاني كنت تقريبا حافظ كل الافكار الواردة في النص و كي روحت للدار قعدت نبربش في الكتب القدم متاعي و بعد طول بحث لقيتو.
النص كان عنوانو "الثوم على الجبين" للدكتور الطاهر الخميري من كتابو "مرآة المجتمع" و كان موضوع
و البحث في بعض مظاهر النفاق الإجتماعي وخاصة النفاق الديني عند بعض افراد المجتمع ....
اهوكة انا باش نعاود النص بنفس الكلام اللي قلتو في القهوة موش كيف ما جاء في النص الاصلي (حساسية من اللغة العربية الفصحى و كذلك من التنقيل)

إذن :
... و قالو
ثمة شكون يربط على جبينو عصابة فيها فص متاع ثوم باش يولي عندو اثار تشبه لاثار السجود و يصبح في عداد المصلين السينيي ( signé)... و هناك شكون اللي ماعادش يستعرف لا بتوقيت تونس المحلي و لا حتى توقيت اخر ، يولي كل شي يقيسو باوقات الصلاة : "خرجت اليوم بعد صلاة الصبح و روّحت قريب وقت صلاة الظهر"... تي ماو جاني مع المغرب قتلو ارجعلي بعد صلاة العشاء..." باش يذكّر اللي يحكي معاهم انو من المصلين المتلزمين الحارصين على الصلاة و مشتقاتها. و ثمة شكون من اللي يعملو عمرة او حجة يولي ماعادش يستعرف بالتقويم الميلادي او التقويم الهجري، حيث تولي احداث 11/09 صارت بعد الحجة متاعو بعامين و الانتخابات التشريعية الجاية تبدى بعد ما يروح هو من العمرة اللي ناوي يعمها بعد مدة... و ثمة شكون يبدى الجامع لاصق في دارو لكن كي يسمع الاذان يمشي من ابعد ثنية للجامع باش يشوفوه اكثر عباد و هو ماشي للصلاة و يشوفو الوهرة متاعو في الجبة البيضة اللي لابسها...
و ثمة شكون كي يجي رمضان يولي يسلم عالعباد كان بـ"غالب او مغلوب" و ما يحكي كان على اوقات الفطور و الإمساك و في النهار يبدى يڨحر للي يبان عليهم عازڨينو, و الادهى من كل هذا انو يصطنع بعض التكريز باش يبان صايم و ما يشك حتى حد في مدى إلتزامو بالصيام رغم الداء و الاعداء... ديجا ريت في الايام اللي فاتت بعض الناس اللي جدت عليهم الهدرة متاع علاقة رمضان بإلغاء العمل بالساعة الزايدة و قعدو يتحسْرو مساكن انهم تحشالهم
في ساعة زايدة من الاجر و الثواب.
و ثمة شكون كي يقرب وقت الزكاة، تتمحور كل سؤالاتو عن الزكاة و قداش لازمو يخرّج و يقارن فيها بقداش كانت في غابر الايام باش يبان قديم في دومان الزكاة و انو كان و مازال حريص كل الحرص على اداءها كاملة...

هذاية كان محتوى النص، و الحق يقال انو الامثلة المذكورة حلولي عينيا على انواع اخرى من النفاق و المنافقين و كذلك انواع اخرى من العوج إلى جانب الرياء و النفاق...

الحاصل يعد هذا النص احد الاسباب الرئيسية للعركات اللي كنت نعملهم و انا صغير مع الدار, حيث نبدى نعسْ عليهم و نراقب في كل تصرفاتهم و نبدى لاعب فيه
ا بو العرّيف و ماعادش تعملو هكة و شبيكم تعملو فيها هكة بينما كنت تنجمو تعملوها بطريقة اخرى،إلخ.. و خلافو من صيغ المبالغة في النصائح و النقد و تكسير بطاطة البعض.
لكني الان مقتنع اني حتى لو كان ما قريتوش النص، بازز راني كنت باش نعمل نفس العركات لان الحياة اليومية متاعنا مملؤة بالعوج اللي يزوّك منو البڨر، خاصة العوج اللي يجي في صيغ شرعية و المشكل انك ما تنجّمش تعمل حيال ذلك حتى شي لانو العوج عند برشة عباد هو منهج حياتي كامل و غير قابل لاي نوع من التغيير. و كذلك ثمة مشكل اخر هو انو العوج هو حاجة نسبية حيث الصحيح عندي انا يمكن يطلع عوج عندك و العكس بالعكس, و ما تعرفش شكون الصحيح خاصة و اننا شعب معروف انو متكلماني و ما يحيرش في الادلة و الحجج و البراهين انو كلامو صحيح... و الادهى من ذلك ان حتى لو كان طلع غالط و ما لقاش حجج يجيبهم باش يدافع على فكرتو،ما يخسر عليك كان : "شـيهمّك ؟" و في بعض الاحيان "شِيـهم دين....!!" و كذلك " هاني نعمل هكاكة تخرالي فيه" و في صيغ اخرى "هاني نعمل هكاكة
و شدني منو" و بعض الالفاظ الاخرى اللي لا يسمح الضمير التدويني بذكرها (إي نعم مازال برشة كلام اخر خلاف هاذوكم).

انا في الاصل قليل وين يجد عليا انو ثمة فيلم
او غناية او كتاب ياثّر في عبد و يكون له دور كبير في تحديد احد جوانب شخصيتو، لكن اناهاني تفكّرت نص قصير قريتو عام النوفيام و كي خممت شوية لقيت انو كان عندو تأثير فيا و دور في "تحديدي", و انا مولى الشخصية مانيش هوني ...
بون صحيح اني نتسمّى فقت بيها الحكاية مخّر شوية لكن نورمال....
حتى حد ما يسالني.

هناك 13 تعليقًا:

  1. ههههههه
    ثمة برشة نصوص يفيقو الواحد ببرشة حاجات ماصطين و يمكن ينجم ينحيهم من بعد وثمة نصوص يدخلو الواحد في حيط زادة.
    أما شنيه حكايتك مع الفصحى؟؟هههههه... بلحق عندك حساسية منها؟؟؟تكرزك الفصحى؟؟

    ردحذف
  2. غير معرف24/3/09 20:17

    يعني لم تقنعنا بعد انك تجاوزت بعد مرحلة الصبى عكس ماتريد التلميح اليه، مثلما انك لم تبرر لنا اختيارك لموضوع النفاق الاجتماعي من دون غيره من المواضيع

    اما النفاق ذاته الذي تتحدث عنه، فانت ازائه في وضعيات ثلاث:
    اما أنك تنكر تلك التصرفات وتاتي عكسها ومثل هذا السلوك يلزمك بان لا تتحدث عن هؤلاء لان تغتابهم وتسخر منهم، وهو ما لم تفعله، واما انك تماثلهم في السلوك ويعنى ذلك انك لست باحسن منهم، واما انك تسخر اصلا من عمليات التقوى حتى وان كانت سليمة، وهذا يعني انك تريد من مقالك الاستهزاء من الشعائر الاسلامية عموما ولكنك تمرر موقفك بطريقة مخاتلة، تعكس تجابنا

    وترى اذن انك جمعت السوءات جميعها من كل الاطراف وفي كل الحالات، فهنيئا لك بهذا المكسب

    ردحذف
  3. شيح ريقك , قتلتني بالضحك

    ردحذف
  4. إذا تذكرت شيء من طفولتك و ذكرته في تدوينة، هذا يعني انك لم تتجاوز مرحلة الصبى؟... إذن فكل المدونين لم يتجاوزوا مرحلة الصبى، إذ يندر ان تخلو اي مدونة من مقال يتناول شي من ذكريات الطفولة و بعيدا عن عالم التدوين، اي شخص مهما كان عمره لا بد له من حديث يذكر فيه البعض من طفولته و لا تنسى ان البعض من كبار الكتاب و المفكرين قاموا بالحديث عن طفولتهم في كتاباتهم....
    يعني كلامك عن عدم تجاوزي لمرحلة الصبى هو مجرد هراء لا نفع فيه (حلوة هاذي "هراء") و محاولة صبيانية لإستفزاز لا يُرجى منه نفع.

    و بالنسبة للغيبة، من الافضل ان تقوم بتصحيحٍ لمفهومك عنها ، فالغيبة تكون فقط بذكر الاشخاص باسمائهم او ما يشير إليهم مباشرة، بينما لم اشر في تدوينتي ( كذلك الدكتور الطاهر الخميري في نصّه) إلى اي إنسان بعينه ، بل تم فقط نقد بعض السلوكيات المريبة التي ياتيها بعض الناس و المتاتية في الاصل من رغبة في التباهي بافعال من المفروض انها من ابجديات الدين و لا يوجد فخر في إتيانها...
    و بالنسبة للتهكم و السخرية من الدين ، انا اتهكم و اسخر من كل ماهو قابل للتهكم عليه و السخرية منه حتى و إن كان الدين، رغم اني تحدثت فقط عن سلوكيات الناس يعني عن تطبيق الناس لدينهم و ليس عن الدين في حد ذاته...
    و بالنسبة لإتهامك لي بالتجابن : برّا العب بعيد...

    ملاحظة اخيرة عن الكم الهائل من الثقة في النفس المتمثل في قولك "وترى اذن..." حيث لا يسعني ان اقول في ثقة ليست في محلها سوى : برّا العب بعيد مرة اخرى

    ردحذف
  5. @لاعب النرد : برجولية انا فديت من الفصحى و خاصة اللي يسخايلوها حاجة كبيرة مقارنة بغيرها من اللغات و فرحانين بحرف هو زايد في الاصل "ض" و ونجموا يعوضوه ب "ظ" او العكس.... اما السبب الاصلي لتفضيلي التدوين بالدارجة هو ان الكلام بالدارجة اسهل و اخف على عين القارئ
    @غمراسي
    شكرا عالمرور و نشالله في ضحكة العرس :))

    ردحذف
  6. غير معرف24/3/09 21:33

    حـكـايـتـك هـاذي يـا "مـيـتـالـيـسـتـيـك" أثـارت فـيّ بـرشـة حـوايـج... و لـكـن أكـثـر حـاجـة قـعـدت تـدور فـي مـخّـي هـو كـيـفـاش الـقـراءة (وبـصـفـة أعـمّ الـمـطـالـعـة) تـثـيـر مـخّ الـبـشـر و تـخـلّـيـه يـخـمّـم و يـتـسـائـل... و يـعـيـد الـنـظـر فـي قـنـاعـاتـو حـتّـى الـلّـي تـبـدالـوا راسـخـة و بـعـدهـا هـي يـوفـى الـحـديـث... مـوش بـالـصـدفـة إنّـو الـشّـعـوب الـلّـي تـقـرا و تـطـالـع أكـثـر مـن غـيـرهـا هـي الـلّـي تـكـون أكـثـر وعـيـا و إطّـلاعـا و يـصـعـب تـبـرويـلـهـا بـلـغـة الـلـوح الـفـالـصـو ...

    ردحذف
  7. لضيق الوقت ما نجمش نعمل بحث باهي اما هاني لقيت دراسة معمولة سنة 2004 و فيها "نسبة القراءة بين الجالية العربية في سيدني أقل بأربعة أضعاف من الجالية الصينية"
    صحيح الدراسة معمولة عن الجالية العربية في سيدني، لكن الوضع هو هو لدى بقية العرب

    http://www.aawsat.com/details.asp?section=19&issueno=9417&article=254350&feature=1

    ردحذف
  8. غير معرف24/3/09 23:19

    الي فوزي مسعودي:
    الله أكبر ...جاء الحقّ وزهق الباطل....الخ..أو بالأحرى : ينصر دينك يا شيخ خلف الله كما قال عادل إمام

    ردحذف
  9. غير معرف24/3/09 23:31

    Je me rappelle de ce texte, mais bon, c'était bien avant l'avenement de 'la neuvieme' h :)

    ردحذف
  10. @الحلاج :
    انا نتفكر عادل إمام قال : ينصر دينك يا استاز نييــفيـــســا.....

    D:

    ردحذف
  11. غير معرف25/3/09 09:56

    :))))))))))
    akthir faza 3ijbitni fazit freud !!

    ردحذف
  12. غير معرف14/2/17 18:51

    أريد شرح نص الثوم على الجبين

    ردحذف

علّق على ما خلطْ... و بالطبيعة أيّ تعليق يحتوي على عبارات منافية للأخلاق الحميدة او منافية لأي نوع آخر من الأخلاق سيتمّ محْقُه...وشكرًا

Je traduis :

5alli commentaire(s) 3la ma 5latt et biensur ay commentaire(s) mouch bèhi yetfasa5...merci