حطّان "الآية" في العجْلة


و انا نبربش في Mes Documents لقيت التصويرة هاذي وو تفكرت اللي انا كنت باش نحطها في المدونة لكن ما نجمتش لظروفي الصحية المتردية حيث ولّيت ما عادش نجّم نقعد اكثر من ربع ساعة قاعد قدام ال PC و تلّخصت حياتي في ما بين التوالات و الفرش..

المهم توة, انا كان حاجتي بلوجيسيال و كي لوجت عليه لقيتو في فوروم عربي لكن ما نجّم نهبْطو كان كي نعمل تسجيل (inscription). انا ما كنتش من العاكسين ، بسملت و بديت في في عملية التسجيل, لكن ما راعني إلا انهم غدروني بسؤال اقل ما يقال عنه انه سؤال معفّط :


(الصورة ماجاتش واضحة برشة، تنجموا تشوفوها هنا)

بون انا للاسف فسخت الحلويات متاع الفايرفوكس (Les cookies ) يعني ماعادش نلقاه الفوروم في الهيستوريك، لكنّي متاكد اللي هو ماهوش فوروم إسلامي، سينون ما ناخذ منو شي و ما نسجّلش فيه موش كي يمدّولي الفلوس.
و انا كي ريتو السؤال ديراكت جات في مخي برشة فازات صارولي او حكاوهملي صحابي عن عباد مغرومة بحطّان العصى الدينية في العجلة :
كيما واحد يحكم على بنتو ما تقراش و ما تريفزش مع اصحابها على خاطر اصحابها الكل شواطن و كلهم ناوين كان عالفعل الخايب و المشكل اللي ساعات تبدى بنتو هي الشيطان متاع الكليك, او يقوم بعض الاشخاص
بتبرئتك من تهمة الرجولة على خاطرك ماكش مربّي لحيتك و بالتالي تصبح ماكش مؤهل باش تعمل برشة حاجات، كذلك الزام البنت بلباس الخمار رغم العراقيل اللي باش تتعرضلهم في الليسي و في الشارع (بون لهنا يتحل موضوع اخر متاع الخمار و مشاكلو مع الحاكم، لكني انا مؤمن انو الطفلة تنجم تكون مستورة بلاش خمار و كذلك بئس" تدُيّن" يتقاس بالقماش قبل الفعل...)
و نتفكر زادة فازة صارتلي قبل و انا عمري 10 او 11 سنة، حيث ثمة واحد من العيلة معروف بتدينو و إلتزامو لم الصغار الكل متاع العيلة و قاللنا شكون يحب يمشي يحوس؟ الكل قلنا اي، لكن قال اللي هو باش يمشي يصلي الجمعة في جامع الزيتونة و مبعّد باش يمشي يحوس و لذلك ما ينجم يمشي معاه كان اللي يصلّي لأنّو ما ينجمش يدخل هو يصلّي و يخلّي صغار وحدهم في الكرهبة او في الشارع و كذلك ما ينجمٌش يخليهم يطّلفحو في الجامع...و فعلاً حُرمت انا و فرخ اخر من المحواسة و رصّاتلنا قاعدين في ديارنا
بالطبيعة انا كان عندي رد فعل عكسي تمثل في كم هائل من الالفاظ الفيسئة (الشي من الصغرة) و طبعا لقدسية الصلاة (في الوقت هذاكة) ما سبّيتهاش، لكن سبّيت الصغار اللي مشاو، و
سبّيت اللي هزّهم يحوّسو و سبّيت اللّي بنا جامع الزيتونة و ما جاوره، و سبّيت حتى باش يعبيلو الإسونص ـ ماو قاللنا اللي هو باش يتعدى للكيوسك قبل ما نمشيو كدلالة على انها "رحلة طويلة لبلاد بعيدة" حسب تعبيره ـ...
بون الفازة هاذي انا نسيتها جملة خاصة و انّي بعد مدة مشيت مع اصحابي وحدنا لدحدح و فشيت غيضي كيف ما حبّيت و إشتهيت, لكن تفكرتها كي قريت السؤال المعفّط متاع الفوروم حيث عاودت خالجتني نفس المشاعر اللي جاتني نهار حرماني من الرحلة...

المهم توة، انا صايي لقيتو اللوجيسيال اللّي حاجتي بيه في بلاصة اخرى و يعود الفضل لـ"الاب الروحي متاعنا" ڨوڨل (حسب تعبير واحدة من زميلاتي في الـ...) و ينجموا جماعة الفوروم يشدوا السؤال متاعهم يعملو بيه
auto-bouchage و كان يحبو اتو نعاونهم.


هناك 5 تعليقات:

  1. :))
    يا والله ريق... هاذكة شمزال
    معناتها الواحد يلزمو يسرفي
    (Surfer)
    عل الأنترنت وحاطط كتاب قرأن بجنب ال
    Souris
    على مايأتي

    ردحذف
  2. زعمة ما توليش فوسكة هكاكة ؟؟
    لازمها فتوى الحكاية

    والله كثر التكعرير يضحّك

    ردحذف
  3. فاعل خير18/3/09 22:45

    سورة (ق) الآية 18

    ردحذف
  4. @فاعل خير

    شكرا... لكن توة انا مشكلتي هي عدم معرفتي برقم الآية؟ ديجا كنت نجّم نلقى الإجابة في ڨوڨل..

    مشكلتي هي تشليك المقدّس من قبل مقدّسيه...
    و شكرا مرة اخرى

    ردحذف
  5. 7low l'article ya Metallistic ;)

    ردحذف

علّق على ما خلطْ... و بالطبيعة أيّ تعليق يحتوي على عبارات منافية للأخلاق الحميدة او منافية لأي نوع آخر من الأخلاق سيتمّ محْقُه...وشكرًا

Je traduis :

5alli commentaire(s) 3la ma 5latt et biensur ay commentaire(s) mouch bèhi yetfasa5...merci