خواطر ڨالڨ بعد فرجة في فيلم

توة بركة كنت نتفرج في فيلم جديد إسمو Watchmen و هو يتصدر حاليا البوكس اوفيس في امريكا و ذلك كان السبب الي خلاني نحربط وراه باش نتفرج فيه... الفيلم فيه كمشة ابطال خارقين كانو اصحاب مع بعضهم لكن توة خذاو الانتريت و كل واحد شد ثنية على روحو و اصبح مواطن عادي كأيها الناس إلا زوز اكهو قعدو سبيسيال : واحد منهم ملقبينو باذكى إنسان في العالم و يتربع على عرش اقوى إمبراطورية صناعية في تاريخ العالم اجمع, و الثاني إسمو "الدكتور مانهاتن" ، و يُعتبر القاعدة الاساسية للقوة النووية متاع امريكا حيث تعرض لحادث في الخدمة متاعو و الحادث هذا عطاه قوة رهيبة و اصبح عبارة عن مفاعل نووي حي و شبهه البعض بالإلاه....
المهم, موضوع الفيلم هو انو العالم على شفير حرب عالمية ثالثة بين روسيا و امريكا و كل وحدة تهدد في لخرى بالقوة النووية متاعها و العباد قاعدة تستنى في الحرب/يوم القيامة بما ان القوة النووية متاع كل بلاد تنجم تقضي عالكرة الارضية 10 مرّات. لكن البطل الخارق الذكي عمل مؤامرة ضد العالم الكل و إستغل القوة متاع صاحبو النووي و فرڨع اهم المدن في العالم كيما نيويورك و موسكو و هونڨ كونڨ...و كانت حصيلة الضحايا 15 مليون رقبة و بذلك عمل حد للتهديدات متاع روسيا و امريكا بالحرب و زاد عملو الرؤساء متاع الدولتين إجتماع و باسو بعضهم منا و منا و قرروا باش يوحْدو قوتهم ضد الدكتور النووي و نساو خلافاتهم...
الفكرة الاساسية متاع الفيلم هو توحد الاعداء كي يطلعهم عدو مشترك و يتلهاو فيه هو و ينساو المشاكل اللي بيناتهم...طبعا هذا إلى جانب طرح المعضلة الاخلاقية الازلية وهي : "هل يمكن قتل ملايين البشر لإنقاذ المليارات منهم؟؟"

لكن اللي الحكاية الي كبشت معاها هي توحد قوى بينهم عداوة كبيرة للقضاء على عدو مشترك، حيث كي عملت غزرة سريعة للمحيط اللي عايش فيه انا لقيت اللي عندنا برشة اعداء مشتركين لكن النافع ربي... لا توحّدنا و لا حبينا نتفاهمو عليهم جملة, حيث كل واحد موش حتى يضرب على درابّوه، بل عالخيشة متاع دارو اكهو.
فالعرب مثلا عندهم اكثر من عدو مشترك، ديجا هذاكة بركة اللي يجمعهم، لكن النافع ربي لا حبو يتوحدو و لا حبو نهار هكة يسترجلو و يلمو بعضهم ضد اي بلاد او لوبي او حتى توريست سكران يطلفح في البلاد و مقيم الاذان في الطريق العام.
و احنا كتونسيين عندنا برشة اعداء مشتركة او بالاحرى عدو واحد كبير و الباقي مجرد صنّاع عندو، لكن حبينا نتوحدو ؟ شي النافع ربي, و المكثرية ان السبب متاع هذا: هو اننا الكل نعرفو شنوة مشاكلنا و زيد الكل نعرفو كيفاش نحلوها لكن الحل متاعي انا خير من الحل متاعك إنت, و الحل متاع فلان ما يتماشاش مع سيستام العيشة متاع فلتان.... و خلاف هذا الكل يجيك واحد يقلك الحل لإصلاح الحياة الدنيا هو تتليف الدنيا و الإلتهاء باشياء ميتافيزقية.

-= فاصل قصير=-

وودي الن :"مرة و انا نعدّي في دوفوار فلسفة حول الميتافيزيقا، طرّدني الاستاذ على خاطر كنت نغزر للرّوح متاع اللي مقابلني و نفسكي منها."

-=إنتهى الفاصل=-

و كي جيت نخمم في اخر توحد كبير صار بين زوز اعداء ضد عدو مشترك تفكرت كان شعار "ولاد العاصميّة" اللي حارب تحتو رايتو فيراج الترجي و فيراج الافريقي ضد فيراج سوسة و وقتها ريت تصويرة - للاسف - تعد غريبة بالنسبة لي، وهي زوز محملين بعضهم و واحد لابس مريول الترجي و لاخر مريول الافريقي و يغنيو في غنايات ضد النجم الساحلي و كي تسأل واحد منهم عن سبب ذلك يقلك نحنا ولاد العاصمة في بعضنا و هوما اغراب...و سمعت إشاعات عن هذا التوحد ايضا بين الفرق السواحلية كي تبدى اللعبة ضد فريق من العاصمة.

بون يزيني مالكورة لانو الموضوع لهنا موش عالكورة و تكتلاتها ، بل عن مفهوم التوحّد ضد عدو مشترك، المفهوم اللي لتوة لا فهمت علاش ماهوش مستوعَب برشة من قبل معظم افراد الشعب. توة و الحمد لله العدو متوفر و ربي ماهوش حارمنا كيما غيرنا، يعني اللي يبكيو "منو".. تي عليه الناس عندنا منو و كل خمس سنين - من غير تخديم مخ عاد - نزيدو نتاكدو من هذا، لكن النافع ربي ... صحيح ثمة شكون قام بمحاولة التمرد و مواجهة هذا ، لكن اكثرهم طاحو و المشكل اننا لو كان نحسبو عدد اللي طاحو و نفرضو اللي العباد هاذوكم توحدو و زدمو الكل مع بعضهم افواجا افواجا, اتو نلقاو الي النتائج ستكون احسن برشة من النتائج الحالية، هذا إن كان عندنا نتائج من اصلو في الوقت الحالي.

إذن هانا هكة كيما نحنا لين ينوب علينا ربي بـعَدو آخر يحل الشاهية للإتحاد...