إفتاء لغاية في نفس طحّان, نقد لغاية في نفس....طحّان زادة

في الايام هاذي الدنيا الكل شاعلة على عادل إمام و كلها بدات تسب فيه على خاطر قيل و انو قال كلام ضد القضية الفلسطينية و بدات الشتائم هابطة عليه على بعضو من عند العباد الكل اللي تستنى في الفرصة باش تقول كلام يوري اللي هوما مع القضية و تسقط إسرائيل وتحيا فلسطين عربية و...و..و... و قد تم إصدار فتوى باهدار دمه و جات الفتوى هاذي من عند واحد إسمو أبو مصعب عبد الودود و هو زعيم للجماعة السلفية للدعوة والقتال الجزائرية "تنظيم القاعدة في بلاد المغرب" .
توة انا حسب ما نعلم, نسكن في المغرب العربي. و متبّع اللي يصير فيها عن طريق وسائل الإعلام من تلفزة و صحافة و مدونات و معاهم زادة الغنايات متاع لطفي دوبل كانون - رغم إمتعاضي الشديد من الرّاب بكل انواعو
و هاذي مسألة متاع ذوق شخصي لا احاسب عليه- لكن رغم هذا انا عمري ما سمعت بيه الزعيم هذا قبل الفازة هاذي متاع الفتوى كذلك ما نضنّش اللي برشة عباد في العالم العربي يعرفوه...
يعني يمكن اللّي سي ابو مصعب ـ
شبيهم ديما الاسامي متاع القادة و الزعماء في الجماعات الإسلامية هكّة؟ زعمة زعمة اسامي من ريحة الزمن الجميل ؟؟ حتى حد ما إسمو رياض, لوئ, ثامر,.... كلهم من نوع إبن ابي شفلحة ـ عاد قلتلكم انا يظهرلي اللي الفتوى هاذي طلعت فقط باش إسم سي ابو مصعب يزيد يبان و يتعرف على خاطر يمن المعروف اللي اي كلمة باش تتقال و يبدى فيها إسم عادل إمام العباد في العالم العربي الكل باش تركز معاها ( السيّد اصحاب هو و انجيلينا جولي)
و خلاف هذا يمكن إعتبار الفتوى عربون طحين لحركات الإخوان في العالم العربي (اللي منهم حماس , و انا و عادل إمام و اي مواطن عربي نحترمو حماس على مقاومتها للعدوان الإسرائيلي, لكن هذا الإحترام يشوبه بعض الـ...)
و بحكم مقاطعتي للتلفزة ما عرفتش بالضبط شنوة اللي قالو عادل إمام باش تصير الفوضى هاذي الكل لكن انا حسب ما فهمت من عند الڨوڨل عرفت اللي هو قال رايو بكل صراحة في المظاهرات الهمجية المناصرة للقضية الفلسطينية اللي تصير في البلدان العربية و اللي من شأنها تعطّل اقتصاد البلاد و تعطّل برشة حاجات اخرى... كذلك تسائل على الغاية الفعلية من هذه المظاهرات و شنوة المنفعة متاعها... يعني طرح اسئلة مشروعة من حقّ اي مواطن انّو يطرحها إنطلاقا من مبدأ "الجميع قابل للنقاش". و انا ريت في الايام الفارطة نفس التساؤلات في برشة تدوينات و قد قوبلت هذه التدوينات بإحترام وصل إلى حد الإعجاب في بعض الحالات. و قام زادة بالدفاع عن بلادو كي إتهموها بالعمالة و الخيانة, يعني قام من موقعو كشخصية عامة بما يجب ان يقوم به اي مواطن وهو الدفاع عن بلده و التصدي لاي محاولة لتشويه صورتها بغضّ النظرعن اي إعتبارات اخرى...
بون اللي زاد كرّزني هو اللي قريتو في برشة مواقع و متنديات من نوع "المووووووووووووت لك يا زنديق يا عميل الخنازيييييييييييررر.....آميييييييييييييييين"... -زعمة هوما كي كتبوه الدعاء مع التمغيط, صايي ضمنو اللي هو باش يوصل فيسع و باش يستجاب له...إوووو - و انا كرّزت على خاطرو كي كان ينتقد في الحكومات العربية بصفة عامة و يجيبها في قالب ضحكة, كان إسمو الزعيم و هكّة هكّة بيه... لكن توة كي قال رايو بكل صراحة في حزب - ظهرلو اللي هو يشكّل سبب جزئي للي صاير في غزّة - اصبح اسمو زنديق و عميل و..و...
بون مادامنا نحكيو على الدعاء باش نخرج عالموضوع شوية لكن من المعروف في الإسلام انو لازم الواحد يكون ماهوش ماكل الحرام باش الدعاء متاعو يستجاب له , و مادام اغلبية العرب عندهم ويندوز مضروب و ماهمش شارينو بوسائل قانونية, يعني رزق حرام... إذن كي واحد يكتب دعاء في فوروم او حتى يحط في الـfond d'écran تصويرة مكتوب فيها دعاء الكوناكسيون, زعمة يستجاب له ؟؟ لازمها فتوى الحكاية...
نرجعو للموضوع, من الاشياء اللي زادت كرّزتني هي مقالين قريتهم في جريدة الصريح كتبوهم سمير الوافي - لقب على ملقَّب ـ و محسن حمدي, حيث قامو بالهجوم على تاريخه الفني و لقبوه بالمهرّج والقزم وانو ديما يكرّر في نفسو - الزح آش جاب لبهجت الابصيري لزينهم الكومبارس لسرحان عبد البصير للواد سيّد الشغّال...- يعني انّو العباد الكل اللي يحبّوعادل إمام و يتبعو في افلامو كلهم بهايم و ماشلقوش اللي هو سلعة مكررة... ,كلهم دغف كان الوافي و صاحبو هوما اللي يفهمو في الفن. كذلك تم الهجوم على شخصه خاصة من قبل الوافي و قال اللي هو مغرور و متكبر... شبيه ما قالهاش على الممثلين متاع هوليوود اللي كل جمعة تسمع بواحد خذا امر إبعاد من عند المحكمة على خاطر ثمة معجب كرّزو.. و شخصيّة كيما عادل إمام بازز تتعرّض لظغط كبير من قبل الصحفيين و المعجبين (السيّد اصحاب هو و انجيلينا جولي) يعني عادي كي ما يخرجش برشة و ما يحكيش مع اللي يجي.
بون انا لا اقصد التعظيم الزائد لعادل إمام -رغم انو
اصحاب هو و انجيلينا جولي- لكن كي يجي واحد يحب ينقد عبد ينقدو بموضوعية...امّا موش على خاطر جات الضربة في إسم كبير يولّي عامل بلعاني و يحبّ يطلّع إسمو على حسابو. عادل إمام يبقى إنسان عادي و الهجوم عليه بسبب تصريحات قام بها ماهوش باش يتسمّى من الملاحم الصحفية...
و انا من الموافقين على اغلب ما قالو عادل إمام خاصّة على الكلام اللي قالوعلى تحويل المظاهرات إلى عمليات تخريبية كذلك قوله بان حماس هي اللي شرات الشبوك و دخلت في حرب ميهاش قدّها كان لازم تحضّر روحها قبل ما تڨاجي, موش عندها طرف مفرڨعات ترمي فيهم من تيريبولات, تمشي تزدم على قوة عسكرية كل يوم قاعدة تتجدد عن طريق المساعدات الامريكية و غيرها.
طبعا لا نقاش انو إسرائيل هي الغالطة مللول و هي اللي جات تفك في البلاد من عند امّاليها, لكن مادام نعرفوها خرى و ماء سخون و ديما تتسبب على اي حاجة, كان لازم القادة متاع حماس يقراو حسابهم و يعرفو على شنوة قادمين , موش ديراكت يبسمل و يرمي فوشيكة تخلف فجعة لـ2 إسرائيليين و اكثر من 1000 جثة فلسطينية.
و حتى لو كان نقولو اللي عادل إمام قال اللي إسرائيل هي الصحيحة و اللي العمليات متاعها تُعتبرعمليات مشروعة... ماهوش باش ينفع إسرائيل و امريكا قد ما نفعوهم الرؤساء العرب بطحينهم, الظاهر منه و الباطن. يعني الاقلام اللي نقدت مواطن عربي على خاطرو قال رايو بصراحة كان من الاحسن ليها ان تنقد العباد اللي قعدت ساكتة, العباد اللي قعدت ساكتة حتى وهي واقفة في الڨمم و الإجتماعات تعيّط و توعد و تتوعد باش تعمل كذا و كذا...و معروف انّ اللوم على السّكوت اهم و اولى من اللوم على الكلام....

هناك 5 تعليقات:

  1. المصيبة ان كثيرا من زملاءه أكملوا الحملة ضده و طالبوه بالإعتذار علنا و منهم على الخصوص غوّار الطوشي و منى واصف و كثيرا من الوجوه المعروفة ببأسها...

    ردحذف
  2. تي ثمة شكون قال اللي هو نقد حماس و قال الكلام هذاكة الكل من منطلق "خالف تُعرف"..., الزززززززح

    ردحذف
  3. هايلة حكاية الدعا المفتقر للمال الحلال. تذكرني بدعاية الـ ART اكا العام. اما بصراحة، الزعيم في هذي زلعها شوية.
    اما ديما يقعد زعيم.

    ردحذف
  4. بمعزل على مواقف دروكدال (اللقب الحقيقي متاع أبو الودود) و جماعة القاعدة (إلي صحيح يحبو يركبو على الحدث) و جماعة المنافقين البودورو متاع الصريح (إلي زادة ما يقلوش رغبة في الركوب) مش ممكن تقييم عادل إمام و الكلام إلي يقول فيه على أنو مجرد موقف "مواطن عربي"... و ما نحكيش لهنا على أنو فنان و يثمل نموذج و هات ماكاللاوي.. عادل إمام معروف أنو ولى بوق متاع الحاكم في مصر... اختار أنو يكون مجرد بوق.. أي موقف رسمي مصري يدافع عليه بشكل آلي... الوضعية هذية ظهرت بشكل مفضوح خاصة في الفترة الصغيرة متاع هامش الحريات إلي صارت في مصر عام 2005... عادل إمام كان بشكل روتيني يتهجم بشكل ساخر على مظاهرات و اعتصامات القوى السياسية المصرية المعارضة.. هذاكة علاش الحملة عليه بدات في مصر من قبل قوى سياسية متنوعة (من اليمين لليسار)..

    بالنسبة لشكون مسؤول على الحرب فإنو هذاكة موضوع آخر كنت عبر ت على رايي فيه.. و كل واحد ينجم يعبر فيه على موقف.. أما مش بالضرورة الناس إلي عندهم نفس الموقف عندهم نفس الأسباب

    ردحذف
  5. شكرا عالمرور
    @ بنت عايلة بالحق ديما الزعيم يبقى زعيم...اما في الفن قفط, مانحبش ندخل الامور في بعضها...يعني رغم مواقفو السياسية الفنان يبقى فنان.
    @ طارق انا ادرك ان عادل إمام اصبح منحاز برشة للحزب الحاكم من حيث سخريته من الإعتصامات السياسية المعارضة ـ كيما قلت إنتي ـ كذلك من حيث تأييده لتوريث الحكم لجمال حسني مبارك...لكن كل هذا شؤون داخلية و تهم كان الشعب المصري... و كذلك ينجم إنسان يكون منحاز للحاكم متاعو ـسواء كان هذا عن إقتناع او مجرد طحين محض ـ لكنو يبقى من حقو الادلاء برأيو خاصة في القضايا اللي تهم الناس الكل دون الخوف من اي فتاوي او من تهجم على إنجازات قائم بها (و بالنسبة لي, الاعمال الفنية متاع عادل إمام يتسماو إنجازات...)

    ردحذف

علّق على ما خلطْ... و بالطبيعة أيّ تعليق يحتوي على عبارات منافية للأخلاق الحميدة او منافية لأي نوع آخر من الأخلاق سيتمّ محْقُه...وشكرًا

Je traduis :

5alli commentaire(s) 3la ma 5latt et biensur ay commentaire(s) mouch bèhi yetfasa5...merci