خواطر تدوّر الخواطر

في الويكاند هذا شاءت الاقدار اني نمشي مع زوز اصحابي لقليبية بما انو واحد منهم باش يطلع يعزف في حفل صغير غادي.. و زيد عندنا صاحبنا اخر قليبي يخدم D.J تطوع باش يقوم بمهة الوصل بين الوصلات الموسيقية و يعمل بهجة في المكان...

انا مانيش باش نحكي لا على الحفلة اللي تعدات باهية و كيفاش عباد من مختلف الشرائح العمرية
جاو و قعدو يسمعو في شباب صغير يغني في نقشات متاع راديوهاد و بينك فلويد ومانيش باش نشكي من بعض "الجهوية" اللي عرضتنا غادي و كيفاش بعض التاكسيات استغلو جهلنا بنظام "التاكسي بالبلاصة" متاعهم و قلبونا...

لكن باش نحكي على خاطرة دورتلي خواطري وقتلي انا قعدت وحدي على سور قصير متاع القهوة نغزر للبحر و نستنى في اصحابي يرجعو من رحلة البحث عن السارفور باش يخلصوه في الماكلة اللي كليناها و قهاوينا...

فبينما انا نحوس بعينيا في مجالي البصري الممتد بين ساقي اللي تتدلدل و بين الحرف متاع الافق, ريت قطعة حبل جايبها بحر واحلة بين الحجر في الماء... ظهرلي منظرها كيما المشنقة... و ديراكت جا في مخي مشهد احدهم و هو مربوط بحبل في رقبتو و معلّق يدلدل في ساقيه....
و في تلك اللحظة بالذات تبربش مخي و سألت نفسي سؤال غبي : علاش العبد كي يشنقوه يموت ؟؟

بون انا ماعرفتش علاش حسيت انو السؤال غبي.... هل انو غبي لأنّي نعرف منذ سنوات طوال كيفاش الشنق يؤدي الى الموت و بالتالي يصبح سؤالي مجرد تضييع للوقت ؟ او لأنّي ما عنديش شكون من معارفي صارتلو شنقة قبل و نجم نسألو و يوضحلي العملية كيفاش تصير...

لكن مخي اللي ما فهمش اني في شبة عطلة اصر على انو يلقى اجابة تواتي ميولاتو السوداوية و بناء عليه اطلق انذار النيكوتين و مع ثاني كمية من السيڨارو ، غمغم مخي و قالي :

المشنوق يموت من قهرتو و حزنو عالارض اللي كان واقف عليها... و بعدوه عليها و عجزو عن فعل اي شي حيال ذلك...
و اللي يضاعف مأساتو هو انو لا ينجم يمسها و لا يحط ساقيه عليها رغم قربو منها...
المشنوق المتدلدلة سيقانه, يعاني من حرمانو من الاحساس اللي استانس بيه منذ اول خطواته...
الاحساس بوجود ارض صلبة ما ترخش بيه، ينجم يبقى يمشي و يجري و ينڨز عليها لين يحقق مرادو و يهبط لقشة من السماء...

كل معاناة المشنوق في اللحظة هاذيكة تتلخص في كونو ما تعلمش يمشي و يجري و ينڤز.... بعيد عن الارض...
.......

و عند اشارة دراشكون، يلقى المشنوق روحو معلق في الهوا... الهوا في البلايص الكل... على يمينو و يسارو ثمة كان الهوا... و من فوقه و
من تحته ثمة كان الهوا... و كذلك من امامه و خلفه...
كلو هوا في هوا...
و المشكل الحقيقي يمثل في ان رغم وجود كل ذلك الهواء المحيط بيه...
ما ينجمش ياخو نفس صغير منو يعاونو على هم الشنق....
فيموت من قهرتو...


بعدما قالي مخي الهدرة هاذي الكل،
طيشت السيڤارو و ربربت عليه في ابتسامة يائسة ...
و انا ربربت عليه لسببين قد يكون لهما اكثر من ثالث... السبب الاول : هو اني ادركت ان السؤال يستمد غباؤو من معرفتي بان مخي من المواد القابلة جدا للغرق و ان الظرف موش مناسب باش نبربشو و نفسّد على روحى بعض النسائم البحرية الباردة...
و السبب الثاني هو ادراكي ان التعليق في الفضاء و الحرمان من الارض الصلبة... و حرمانك من الهواء الداير بيك -سواء اللي نتفسوه او الانواع الاخرى-, لا يتطلب دائما مشنقة...

فـ
ـــهـــنــــا توجد انواع كثيرة للشنق و تستعمل فيه ادوات و وسائل عديدة اهونها هو التعليق بالحبل... فمن حسنات التعليق الحبل ان الشنق يدوم بضع دقائق طوال ... بينما الطرق الاخرى - الموجودة هنا - تدوم بضع اجيال فقط... و من حسنات التعليق بالحبل كذلك ان المشنوق ينجم "يفرفط" و لو لبضع ثواني قبل ما يموت...
بينما الانواع الاخرى من الشنق
....

و مع السيڤارو الثاني
فديت وكرّزت كثيرا كي ادركت ان حلمي و حلم غيري هــنــا موش نمنْعو رقابنا من الشنق...
بل ان نعطيوها تفرفيطة صغيرة...

هناك 9 تعليقات:

  1. انتي هو الباهي :)))

    ردحذف
  2. شكرا على ها الشنقة وشكرا على الموسيقى المصاحبة :-)

    ردحذف
  3. اسلوبك هايل .. خلاني و انا نقرا ، مرّة نفدّ .. و نلوّج عالنّفس ..و مرّه نتفرهد شويّه .. حلوّة ياسر

    ردحذف
  4. نص أكثر من 'هايل' !!!

    ورغم الأفكار السوداوية الداكنة و الي عاطية عالأكحل الدامس الموجودة فيه ؛ ما راعني إلا إني عملت عليه 'بون كيف '... زعمه علاه؟؟! نطلعشي مشنوقة و ماخصني كان ماكلة الحلوى؟؟! :'(

    پ س: ماعادش تمشي لقليبية حتى تاخو ال OK من عند أختك الكبيرة! sinon هزها معاك!

    ردحذف
  5. @ارتيكولي :
    لا شكر على شنقة، هذا اقل واجب... ههههه

    @براستوس
    شكرا صديقي... شهادة اعتز بها... :))

    @Tamtouma


    مادام توة تجي تحسب المشانق تغلط، يمكن...
    و المشكل انو ثمة برشة عباد مشنوقة و ما في بالهاش و زيد من فوق مكبشة في المشانق متاعها و ما تحبش تسيبها...

    پي اس : عود اكتب "پي اس" :P

    ردحذف
  6. mouch bèhi halli 3maltou !!!
    3andi moda n3awwed fi mo5i bi baladat adhehn w n7eb neb3ed 3la ay tafkir min cha2nou innou y7ayrani wella yfaya9ni wella 7atta ylahni chwaya 3al 7ayèt el bè2sa elli n3ich fèha ..
    w tji syètek tkassarli fi kraymi taw ? maw labès !!!!!!!!

    ردحذف
  7. lol Black , 7awel nched rou7i ama chay, allah ghaleb.. chan9a a9wa meni

    ردحذف
  8. غير معرف14/11/11 23:11

    يحكيو
    على طفل
    راجل شايب صغير
    ديما يضحك يكفر من السماء و يبكي يحب يطير
    ينفس الارض و يتخنق كان بيها hhhhhh voila c mon commentaire

    ردحذف

علّق على ما خلطْ... و بالطبيعة أيّ تعليق يحتوي على عبارات منافية للأخلاق الحميدة او منافية لأي نوع آخر من الأخلاق سيتمّ محْقُه...وشكرًا

Je traduis :

5alli commentaire(s) 3la ma 5latt et biensur ay commentaire(s) mouch bèhi yetfasa5...merci