إفتاء لغاية في نفس طحّان, نقد لغاية في نفس....طحّان زادة

في الايام هاذي الدنيا الكل شاعلة على عادل إمام و كلها بدات تسب فيه على خاطر قيل و انو قال كلام ضد القضية الفلسطينية و بدات الشتائم هابطة عليه على بعضو من عند العباد الكل اللي تستنى في الفرصة باش تقول كلام يوري اللي هوما مع القضية و تسقط إسرائيل وتحيا فلسطين عربية و...و..و... و قد تم إصدار فتوى باهدار دمه و جات الفتوى هاذي من عند واحد إسمو أبو مصعب عبد الودود و هو زعيم للجماعة السلفية للدعوة والقتال الجزائرية "تنظيم القاعدة في بلاد المغرب" .
توة انا حسب ما نعلم, نسكن في المغرب العربي. و متبّع اللي يصير فيها عن طريق وسائل الإعلام من تلفزة و صحافة و مدونات و معاهم زادة الغنايات متاع لطفي دوبل كانون - رغم إمتعاضي الشديد من الرّاب بكل انواعو
و هاذي مسألة متاع ذوق شخصي لا احاسب عليه- لكن رغم هذا انا عمري ما سمعت بيه الزعيم هذا قبل الفازة هاذي متاع الفتوى كذلك ما نضنّش اللي برشة عباد في العالم العربي يعرفوه...
يعني يمكن اللّي سي ابو مصعب ـ
شبيهم ديما الاسامي متاع القادة و الزعماء في الجماعات الإسلامية هكّة؟ زعمة زعمة اسامي من ريحة الزمن الجميل ؟؟ حتى حد ما إسمو رياض, لوئ, ثامر,.... كلهم من نوع إبن ابي شفلحة ـ عاد قلتلكم انا يظهرلي اللي الفتوى هاذي طلعت فقط باش إسم سي ابو مصعب يزيد يبان و يتعرف على خاطر يمن المعروف اللي اي كلمة باش تتقال و يبدى فيها إسم عادل إمام العباد في العالم العربي الكل باش تركز معاها ( السيّد اصحاب هو و انجيلينا جولي)
و خلاف هذا يمكن إعتبار الفتوى عربون طحين لحركات الإخوان في العالم العربي (اللي منهم حماس , و انا و عادل إمام و اي مواطن عربي نحترمو حماس على مقاومتها للعدوان الإسرائيلي, لكن هذا الإحترام يشوبه بعض الـ...)
و بحكم مقاطعتي للتلفزة ما عرفتش بالضبط شنوة اللي قالو عادل إمام باش تصير الفوضى هاذي الكل لكن انا حسب ما فهمت من عند الڨوڨل عرفت اللي هو قال رايو بكل صراحة في المظاهرات الهمجية المناصرة للقضية الفلسطينية اللي تصير في البلدان العربية و اللي من شأنها تعطّل اقتصاد البلاد و تعطّل برشة حاجات اخرى... كذلك تسائل على الغاية الفعلية من هذه المظاهرات و شنوة المنفعة متاعها... يعني طرح اسئلة مشروعة من حقّ اي مواطن انّو يطرحها إنطلاقا من مبدأ "الجميع قابل للنقاش". و انا ريت في الايام الفارطة نفس التساؤلات في برشة تدوينات و قد قوبلت هذه التدوينات بإحترام وصل إلى حد الإعجاب في بعض الحالات. و قام زادة بالدفاع عن بلادو كي إتهموها بالعمالة و الخيانة, يعني قام من موقعو كشخصية عامة بما يجب ان يقوم به اي مواطن وهو الدفاع عن بلده و التصدي لاي محاولة لتشويه صورتها بغضّ النظرعن اي إعتبارات اخرى...
بون اللي زاد كرّزني هو اللي قريتو في برشة مواقع و متنديات من نوع "المووووووووووووت لك يا زنديق يا عميل الخنازيييييييييييررر.....آميييييييييييييييين"... -زعمة هوما كي كتبوه الدعاء مع التمغيط, صايي ضمنو اللي هو باش يوصل فيسع و باش يستجاب له...إوووو - و انا كرّزت على خاطرو كي كان ينتقد في الحكومات العربية بصفة عامة و يجيبها في قالب ضحكة, كان إسمو الزعيم و هكّة هكّة بيه... لكن توة كي قال رايو بكل صراحة في حزب - ظهرلو اللي هو يشكّل سبب جزئي للي صاير في غزّة - اصبح اسمو زنديق و عميل و..و...
بون مادامنا نحكيو على الدعاء باش نخرج عالموضوع شوية لكن من المعروف في الإسلام انو لازم الواحد يكون ماهوش ماكل الحرام باش الدعاء متاعو يستجاب له , و مادام اغلبية العرب عندهم ويندوز مضروب و ماهمش شارينو بوسائل قانونية, يعني رزق حرام... إذن كي واحد يكتب دعاء في فوروم او حتى يحط في الـfond d'écran تصويرة مكتوب فيها دعاء الكوناكسيون, زعمة يستجاب له ؟؟ لازمها فتوى الحكاية...
نرجعو للموضوع, من الاشياء اللي زادت كرّزتني هي مقالين قريتهم في جريدة الصريح كتبوهم سمير الوافي - لقب على ملقَّب ـ و محسن حمدي, حيث قامو بالهجوم على تاريخه الفني و لقبوه بالمهرّج والقزم وانو ديما يكرّر في نفسو - الزح آش جاب لبهجت الابصيري لزينهم الكومبارس لسرحان عبد البصير للواد سيّد الشغّال...- يعني انّو العباد الكل اللي يحبّوعادل إمام و يتبعو في افلامو كلهم بهايم و ماشلقوش اللي هو سلعة مكررة... ,كلهم دغف كان الوافي و صاحبو هوما اللي يفهمو في الفن. كذلك تم الهجوم على شخصه خاصة من قبل الوافي و قال اللي هو مغرور و متكبر... شبيه ما قالهاش على الممثلين متاع هوليوود اللي كل جمعة تسمع بواحد خذا امر إبعاد من عند المحكمة على خاطر ثمة معجب كرّزو.. و شخصيّة كيما عادل إمام بازز تتعرّض لظغط كبير من قبل الصحفيين و المعجبين (السيّد اصحاب هو و انجيلينا جولي) يعني عادي كي ما يخرجش برشة و ما يحكيش مع اللي يجي.
بون انا لا اقصد التعظيم الزائد لعادل إمام -رغم انو
اصحاب هو و انجيلينا جولي- لكن كي يجي واحد يحب ينقد عبد ينقدو بموضوعية...امّا موش على خاطر جات الضربة في إسم كبير يولّي عامل بلعاني و يحبّ يطلّع إسمو على حسابو. عادل إمام يبقى إنسان عادي و الهجوم عليه بسبب تصريحات قام بها ماهوش باش يتسمّى من الملاحم الصحفية...
و انا من الموافقين على اغلب ما قالو عادل إمام خاصّة على الكلام اللي قالوعلى تحويل المظاهرات إلى عمليات تخريبية كذلك قوله بان حماس هي اللي شرات الشبوك و دخلت في حرب ميهاش قدّها كان لازم تحضّر روحها قبل ما تڨاجي, موش عندها طرف مفرڨعات ترمي فيهم من تيريبولات, تمشي تزدم على قوة عسكرية كل يوم قاعدة تتجدد عن طريق المساعدات الامريكية و غيرها.
طبعا لا نقاش انو إسرائيل هي الغالطة مللول و هي اللي جات تفك في البلاد من عند امّاليها, لكن مادام نعرفوها خرى و ماء سخون و ديما تتسبب على اي حاجة, كان لازم القادة متاع حماس يقراو حسابهم و يعرفو على شنوة قادمين , موش ديراكت يبسمل و يرمي فوشيكة تخلف فجعة لـ2 إسرائيليين و اكثر من 1000 جثة فلسطينية.
و حتى لو كان نقولو اللي عادل إمام قال اللي إسرائيل هي الصحيحة و اللي العمليات متاعها تُعتبرعمليات مشروعة... ماهوش باش ينفع إسرائيل و امريكا قد ما نفعوهم الرؤساء العرب بطحينهم, الظاهر منه و الباطن. يعني الاقلام اللي نقدت مواطن عربي على خاطرو قال رايو بصراحة كان من الاحسن ليها ان تنقد العباد اللي قعدت ساكتة, العباد اللي قعدت ساكتة حتى وهي واقفة في الڨمم و الإجتماعات تعيّط و توعد و تتوعد باش تعمل كذا و كذا...و معروف انّ اللوم على السّكوت اهم و اولى من اللوم على الكلام....

ربع حكاية

ثمة قافلة تمشي في الصحرا فيها 5 جمال و يسوڨ فيهم راجل كبير و معاه طفل صغير يخدم صانع عندو. الطفل سمع الجمال يشكيو مشالهم يشوف فيهم شبيهم و بدا يسأل فيهم بالواحد بالواحد :
قالو الجمل اللولاني:
ـ فديت انا , ديما كي نسافرو نبقاو نمشيو برشة...
الجمل الثاني :
ـ انا زادة فديت , ديما نهزو برشة دبش رزين , ظهري نحس فيه باش يتقسم...
الجمل الثالث :
انا فديت , ما
كم سمعتو بينا نصبرو , خريتو فيه و ولّيتو ما توكّلونا كان مرة في الشهر...
الجمل الرابع :
إي بالحق انا بيدي فديت منها الحكاية هاذي متاع الجمل صبور , ززح ما نشرب الماء كان نهار العيد !!
الجمل الخامس قعد ساكت ياخي سألو الطفل : و إنتي شبيك ساكت؟ ماكش متقلق من حتى شي؟؟
قالو : المشيان برشة و الجوع والعطش إستانست بيه و ما عندي علاش نشكي منو توة... اما علاش نحنا مربوطين بالبهيم اللي راكب عليه عرفك و مللي تولدنا و نحنا نمشيو وراه....

البصّ الإعلامي


و انا شايخ على سيڨارو الصباح و نترشف في النسكافي, خدّمت البروكسي و دخلت لموقع العربية.نت.. وبينما قاعد نقرى في الأخبار و ندوّح في راسي على انغام "Penumbra" لقيت صونداج من ابهم ما جادت به القرائح في عالم الصّناديج :




تي كلمة هدنة من اصلو فيها إشكال,حيث ما تجيش هدنة بين طرفين واحد فيهم عافس في لاخر, الهدنة تتطلب توازن القوى بين المتهادنين..
الزّزح و ألف ززحْ...تي زعمة شكون اللي باش يفرض شروطو على لآخر في إتفاق بين طرفين يقعان في اقصى طرفي القوة ؟
الإستفتاء هذا فكّرني بالأسئلة الركيكة متاع المسابقات اللي يجيبوهم في القنوات بودورو اللي يبدى فيهم الجواب واضح و زيد المنشّط يبدى يلمّح و يعاود باش نعرفوه و بالتالي نتشجعو باش نبعثو الـsms تلو الـsms
و لو كان يستعملو كلمات كيما : توقف مؤقت, إستراحة ما بين الشوطين او حتى وقفة طلالية يكون المعنى اصح من كلمة "هدنة" اللي توهم القارئ اللي العرب عندهم كلمة تتسمع في اي حاجة, خاصة الحاجات اللي تمسّهم مباشرة...
ماو العرب ديما يبقاو محايدين حتى في القضايا متاعهم

طفوليات (من باب التنبير على الأعياد)

بما انو اليوم هو اليوم الوطني للطفولة حتى حد ما ينجّم يحكي على الإنجازات متاع الدولة خير من نوفل...بون نجمو زادة نسألو الاولاد الصغار الي يعرضوك في الميترو و المحطات و الرونبوانات... و يبداو يبيعو في كل شي من الدخان المضروب و الوقيد و البريكيات إلى الموشوار فائق النعومة ذا الطيّتين( Double épaisseur)

لكن خلاف اطفال تونس, اطفال غزة و العراق و الصومال و السودان و باقي الدول الأخرى اللي من نفس الفصيلة... زعمة يعرفو شنوة
المعنى متاع "عيد الطفولة" او حتى المعنى متاع "الطفولة" من اصلو؟؟
يظرهلي لو كان جيت في بلاصتهم اتو نحس اللي كلمات كيما "طفولة" و "طفل"
يعنيو فقط الضعف و القهر لعجزهم مقاومة اي محاولة لإغتصاب حقّهم في الحياة كبشر او حتّى حقّهم في الحياة بصفة "فيزيائية"..
يظهرلي لو كان جيت في بلاصتهم و ما نلقى ما ناكل, ما نلقى ما نلبس , كي نرى امي تموت قدام عيني بكرطوشة او من الجوع... او حتى من البكاء...
اول حاجة نقولها : "بايّ ذنب وُلدت؟"
لو كان جيت في بلاصتهم راني و راني....
جاب ربي انا و اللي يقراو في التدوينة ما جيناش في بلاصتهم
لكن هوما جاو...
و بمناسبة عيد الطفولة , بعض الصور لما تعنيه الطفولة لبعض الاطفال :







بون نعرف اللي الكلام هذا نورمالمون يتقال في اليوم العالمي للطفل موش في اليوم الوطني. لكن يوم وطني, يوم عالمي او حتّى يوم جهوي...كلها مرمّة, كلها اعياد جوفاء ما تنفع حتّى حد ... و حتى الإحتفال بيها يبانلي نوع من التفوريخ

ليت الملك يشرب كل يوم برميل من الخمر في مقابل...

غزة , السعودية , النفط , امريكا , الخمر , طحين بلا حدود...


video

صور...

هاذم تصاور من مظاهرات صارت في ليسي "2 مارس الوردية" تسلّفتهم من عند معرفة...










دقيقة صمت...




حكاية تنجّم تصير لأي واحد...

تي ماو مرة و انا نحوّس في البلاد على غير هدى و قاعد نستمتع بكل ما أوتيت من نظر ببلادي و يا لها من بلاد كيما قال لآخر... فجأة لقيت روحي نسوق في في كرهبة مرسداس فيها اللي يزهّز 10 ديار من تلافز و كليماتيزورات و فريجيدارات... و انا من الأشخاص اللي كي تجيهم نعمة ما يقولوش "من اي لي هذا", اهوكة نستعملها و نستغلّها إلى ان يأتي ما يخالف ذلك...
عاد بعد الدلال و العزّ هذا الكل اللي جا من حيث لست ندري , جاو برشة كراهب من فصيلة المرسداس و اخواتها دارو بيا و حصروني في وسطهم و معاهم موتورات كبار يسوقو فيهمجماعة من قبيلة بني عملاق...الحاصل باينة موكب متاع مسؤول مهم ما يطيحش على وزير في اسوء الحالات..
انا تفجعت وخفت لا ناقف نضرب كرهبة منهم و تراصّيلي متهم بمحاولة إغتيال مسؤول و قلب نظام الحكم و غيرها من التهم اللي تقعّد على شقف...,
تقعّد على شقف مكسّر...عاد رصّاتلي نتبّع فيهم هوما يمشيو يسار نمشي معاهم , يمشيو عاليمين نمشي معاهم...
انا عجبتني الحكاية مبعّد بما انو اول مرة نسوق في كياس فارغ ما فيه كان كرهبتي و الموكب اللي معايا و زيد نمشي دون الإهتمام بإشارات المرور حيث البلايك متاع السّتوب و تحديد السرعة الكل تنحّاو, الأضواء الكل ولاّت خضرا......يعني مواطن و تحلّو في الجنّة اوتوروت
بعد كل هذا وصلت لبلاصة كلها قصورات و حدائق و هيلمان غريب لم تراه عين و لم تسمع به أذن و لم
يخطر على قلب بشر...الحاصل عاملين "جنة bêta" و مبعد كي هبطت من الكرهبة جاوني برشة عباد و كلهم يرحبو بيا و يقولو في برشة كلام ببرشة لغات و لهجات فهمت منهم كان ": مرحبا بك في بلدك الثاني سيدي الرئيس, اهلا بك مرة اخرى سيادة الزعيم القائد..." هزّيت راسي الفوق لقيت شوليقة كبيرة مكتوب عليها : "القمّة العربية الإستثنائية في دورتها الرابعة عشر" و بما اني سمعت نفس الكلام يتقال للعباد الكل اللي بحذايا فهمت اللي كلهم رؤساء و انّو الإجتماع هذا يحضروه كان الرؤساء العرب. و ما اكثرهم ها الرؤساء و لهنا نشكرو بالطبيعة الإستعمار اللي جعل عدد الدول هاذي اكبر من عدد المدارس الإبتدائية بتشيكوزلومانيا و خلّى الواحد لازمو 20 سنة باش ينجّم يحفظ اساميهم و اسامي رؤسائهم.
عاد دخلت مع زملائي الرؤساء لقاعة كبيرة و لقيت طاولة كبيرة محطوط عليها الاف مؤلفة من اصناف الماكلة... كي تغزر بركة لانواع اللحوم الموجودة تقول بيلفيدار كامل مذبوح...و بعد ما كلينا, قمنا و دخلنا لقاعة اخرى اكبر فيها طاولة مستديرة و بحذا كل كرسي من الكراسي الدايرة بيها ثم
ة علم مركوز, عاد انا قعدت نلوّج على علم يشبّه للعلم اللي كان على الكراهب اللي رافقتني مللول و مشيت قعدت بحذاه و لقيت ورقة حاضرة فيها ملخّص للقرارات اللي باش ياخذوهم بعد الإجتماع. عاد قلت في قلبي "آش مجيّبني انا كي هوما صايي خذاو قرارات!؟"و زيد مالقيتش اي تاريخ مكتوب على الورقة او حتى مجّرد تذكير بعدد الدورة اللي تم فيها أخذ القرارات هاذي. يعني ان هذه القرارات صالحة لكل مكان و زمان و ما تتبدّلش تحت اي ظرف من الظروف...
ثم بداو الحضور بإلقاء كلماتهم الواحد تلو الآخر. و يحرز انا اوّل مرّة نحضر معاهم , سينون راني حلفت اللي كل واحد من الرؤساء و الزعماء قاعد يعاود في نفس الكلام و الخطاب اللي قالو المرة اللي فاتت...
المهم كي جا دوري انا باش نحكي تربثت و مالقيت ما نقول... و مبعّد إسترجعت طرف ثقة في نفسي و قلت لروحي انا حفظتو كلام الرؤساء في المؤتمرات و الإجتماعات من خلال تجاربي مع شرائط الانباء و خلاف هذاكة لاحظت اللي كل وقفة متاع رئيس لإلقاء كلمتو تمثّل الإعلان عن موعد القيلولة لباقي الرؤساء يعني ماهمش باش يركزو معايا برشة...
لذلك
خذيت نفس عميق و :
بسم الله الرحمن الرحيم ...
ايها الإخوة الزعماء...
ايها الإخوة اشكر لكم حضوركم لهذه القمة الإستثنائية و اوجه تحية لكم و لشعوبكم المقدامة على وقفتكم المتضامنة مع كل ما يحصل لنا من مشاكل و ازمات من جرّاء الحسد الذي يتوهج في قلوب اعدائنا...
هؤلاء الاعداء الذين حاولوا إضعافنا بمحاولاتهم المستميتة لتنغيص حياتنا و حياة شعوبنا الخالدة...
هؤلاء الاوباش الذين.............
هؤلاء الكلاب الذين..............
هؤلاء الـ.......
(حاسيلو حكاية 23 جملة كلها تبدى بـ"هؤلاء" و و تحمل نفس المعاني ...)
ايها الإخوة الزعماء...
ايها الإخوة لن اضيّع وقتكم و وقت شعوبنا في هذه الحظات الحاسمة من تاريخ الأمة العربية بتطويل و تمغيط الخطب بالمقدمات و الديباجات الخاوية...بل ساختصر كلامي:
إذن بإسمي و إسم شعبي و إسم كل عربي ادين و اندد و اشجب و استنكر و ارفض كل الذي فعله الأعداء بنا في لحظة غدر... و اتضامن و اتعاطف مع كل ضحايا هذا العدوان الغادر...
و آخر قولي لكم شكرًا على الإستماع و حسن المتابعة و لي بكم لقاء في التنديد والشجب القادم..
انا دوب ما كملت الخطاب متاعي و بداو باقي الرؤساء يصفقوا لين بحّت حناجرهم... ثم قام واحد قال الكلمة الختامية و تم الإعلان على نهاية الڨمّة و بداو الرؤساء يحكي
و في مسائل جانبية تهمهم هوما كأشخاص فقط بحكم العلاقات الوطيدة اللي تربطهم ببعضهم ...
و بحكم طبيعتي المتلِّّفة للشؤون الخاصة بالاخرين, ديراكت قمت و روّحت فرحًا مسرورًا...لكن خذيت قرار باش ما عادش نحضر حتى قمّة عربية و الحمد لله لتوّة مازلت محافظ عليه القرار و ما تراجعتش فيه...


قطائف من بلادي...

في يوم من الأيّام ( ما نعرفش علاش يقولوها هاذي؟ تكونش عليه ثمّة يوم ماهوش من الأيّام) قاعد نمشي انا و واحد ياخي عرضنا واحد آخر. وها "الواحد الآخر" معروف انّو حاشيه في كل شي و في المجالات الكل : حسن الخلقة و الخلق, رجل يتفجّرحيوية و نشاط, طيب القلب, هادئ الطباع, ميسور الحال, سخطة في تدبير شؤونو... تي كان باش نكمّل نحكي عليه باش نعمل فقرة كاملة تشبّه لإعلانات الزواج في الجرايد اللي ما فيهم حتى واحد خايب الخلقة او واطي الخلق... الحاصل ما نطوّلش عليكم جانا ها "الواحد الآخر" ا مكشبر و ماهوش قد بعضو و يهمهم بكلام غير مفهوم و باين يكفر و يسب في النهاراللّي تولد فيه بكل ما أوتي من قلة تربية...
عاد بهتنا نحنا في حالتو و قلنالو:
ـ يا ولدي ماو لاباس ؟؟ شبيك فادد و متغشش؟
الواحد الآخر : "تي يلعن بو ها البلاد اللي عايشين فيها و ها الزمان الكلب اللي عايشين فيه..." و زاد قال الفاظ لا يسمح الضمير التدويني بذكرها.
عاد انا خممت و شوية و قتلو :بااااز راك مشيت لإدارة من الإدارات باش تطلّع ورقة او باش تخلص فاتورة و قعدت تستنّى في صف طويل و عريض - هو كي تجي تشوف نحنا ديما الصفوف عندنا تمشي و تعراض موش تطوال , ما فهمتش العباد كيفاش فهموه مصطلح "صفّ"... اللي يجي ديما يبقى بجنب خوه موش وراه...يمكن ثمة حساسيات دينية و اخلاقية من الاتيان من الخلف...و الله اعلم - وبعد المعاناة هاذيكة الكل, كي وصلت للڨيشي فاجئوك و بشّروك بعدم جدوى كل ذلك الانتظار لأنّ "سي فلان مشى يشرب في قهوتو و سي فلتان ما جاش اليوم... و سي دراشكون عندو دراشنوة منعو من تحضير ورقتك..." و غيرها من الاسباب و العوامل اللي تحيل على "ارجع غدوة"..
قال : لا لا ما مشيتش لإدارة...الله يكفينا شر المرج الإداري و العذاب متاعو. اما اليوم راني...
قصّيت على كلامو و قتلو :
مالا باز في الثنية و إنتي ماشي للإدارة (رغم إنو قالي اللي هو ما مشاش لحتى إدارة) تعذبت في وسائل النقل و راك دخت من الروايح و الدزّان و الحس و الفوضى متاع العباد ...و زيد راك عملت عركة مع واحد(ة) على خاطر جاك تليفون و كي مديت يدك لمكتوبك باش تجبد البورطابل مسيت بلاصة من البلايص الحساسة في بدنو(ها) - كي تجي تشوف تلقى اللّي البلايص الكل تولي حسّاسة في وسائل النقل - و خلاف هذاكة راك سمعت وسخ وذنيك و صبرت لين ما عادش في قوس الصبر من منزع كيما قال ابو لهب, و ِلِحْمت بيناتكم و بدات الأصوات تنادي بالتدوير للمركز و اصوات اخرى تنادي بالصلاة على النبي و تفادي الذهاب للمركز خوفًا على مصالح الركاب من التعطيل و خوفاً ايضًا من تكبيش البوليسية في المرسكين...
قالي : يا ولدي موش هكاكة الحكاية و ما مشيت لحتّى إدارة و ما ركبتش لا في الميترو و لا في الكار, تي ماو في بالك عندي كرهبة...
قصيت عليه مرة اخرى و قتلو : آآآه !! توة فهمت... و إنتي مروّح وقّفك الحرس و قعد يثبّت في الاوراق و يعاود يقرى فيهم تكونش عليه يهجّي في الحروف... وبدى يلمّح في رغبتو برشوة لله تعاونو على همّ الزّمان و خلاف هذا راك طحت في أومبوطياج بوه كلب بسبب الفوضى و البهامة في تنسيق الأشغال البلدية - و بالمناسبة هاذي نشكر البلدية على تفهّمها و إستيعابها انّو الكراهب تحتاج إلى كياسات مُعبّدة و مسطّحة لها حد ادنى من العُرض و الوِسع....و كذلك حد ادنى من الحفر-. و من غير ما نحكي على اسوام الإسونص اللي ديما تطلع و ما تهبطش حتى كي يُرخص سوم البترول في العالم...
قالي يا ولدي امور الكرهبة لاباس و ما وقفني حتّى حد اليوم...
عاد انا اطلقت العنان لخيالي و إبتعدت على المتع اليومية في تونس و قتلو:
اه مادام هذا الكل ما صارش يظهرلي فيك مازلت كي تفرّجت في الأخبار و فدّيت ملّي صاير في غزّة و العراق والعباد اللي تموت على بعضو و العرب كيما العادة ما يعملو حتّى ردّة فعل و كان حبّوا يعملو اهوكة ينددون و يشجبون فقط وفوق هذا كي يجيو ينددو و يشجبو يقول كلمتين في العدو و يكون باقي الشجب موجّه لطرف عربي آخر و تزيد تلحم بيناتهم و ما يوصلو لحتّى شي....الحاصل تقريب 340 مليون نسمة عمرهم ما عملوا حاجة باهية... تي لو كان جاو 340 مليون ذبّانة راهم طردو الأعداء متاعهم بمجرد الإتحاد والإتفاق على تحريك جوانحهم فرد وقت اتو يطيّروهم او حتى يهبلوهم بالـ"أزيز" متاعهم.
"الواحد الآخر" صاح قائلاً : يا ولدي اما عراق و اما ذبّان تي موش هكّة الحكاية اما راهو في الـ2009...
قتلو: "اااااااااه إستنّى إستنّى !!! فهمتك.. ماو نعرفك قاري و تفهملها في السياسة..."و سكت انا للحظة و تلفت يمنة و يسرة و من خلفي و امامي و تأكدت اللي ما ثمّة حتى حد في محيط شعاعه 3 ميترو و قتلو : ما تكون كان فادد من الحياة السياسية الميتة في تونس اللي يصول و يجول فيها كان واحد بركة من غير ما يلقى شكون يجي ضدو, و ما تلقى كان احزاب صورية متاع هاني معاكم لا تقولو نظام ملكي. و فوق هذا يزيد يجي في التلفزة امين عام متاع حزب من احزاب المعارضة و يشكر الرئيس على تعاونو و السماح لحزبه بالمنافسة و و يشكرو ايضا على الدعم متاعو للحزب -
لكن نورمالمون مايشكروش لأن هذا الدعم ما يتسمّاش مزيّة مادام الحزب المدعوم هو فرع من فروع الحزب المدعِّم -... و يمكن ان يكون هذا الدعم يتمثل في التمويل للحملات الإنتخابية متاعهم باش ينجّموا يعلقوا طرف شوالق في البلاصات و محطات الكيران و غيرهم من المواضع القابلة للتعليق عليها... حاسيلو ناقص كان يكريو ظهورات العباد يعلقو عليهم برامجهم الإنتخابية. و رغم إختلاف الوان و اشكال هذه الشوالق إلا ان الشعب الكريم يدرك انها شوالق قزوردية تمثل كلها لون واحد, لون بعيد كل البعد على اللون الصحيح متاع الحياة السياسية اللّي لازم تكون موجودة في نظام جمهوري...
قالي "الواحد الآخر" : إنتي صايي هترت و بديت تهز من الجابية و تحط في الخابية. الكلام اللي قلتو الكل ما عندو حتى علاقة بمشكلتي.انا اللي فددني هو كيفاش كمشة طحّانة ما لقاوش شكون يوقفهم عند حدهم...
قتلو (كيما العادة نقص على كلامو) :" اااه برّا برّا!! عرفتك شنوّة تقصد. إنتي بااز سمعت بعملة جديدة من عمايل افراد العايلة المالكة. اللي فرعون و قارون و غيرهم ممن عاثو في الأرض فسادا, يتسماو ملايكة قدامهم"... ثم سكت انا شوية قعدت نخمّم و قبل ما يتكلم هو صحت فيه مفجوع : "آها تمشيشي وصلّك الطشّ, و إنتي هو الضحية متاعهم المرة هاذي و فكّولك حاجة..."
كرّز هو و قالي بنبرة عنيفة بعض الشئ : يا ولدي تي شبيك تحكي هكّة !! الكلام اللي تحكي فيه الكل ما صارليش اليوم... و برجولية ما عادش عليّا بكري, اتو نحكيلك مبعّد كي نتقابلو.
قتلو: باهي مالا, نتقابلومبعّد و نحكيو... ايّا نبقّيك عليه
ـ الشدّة فيه و العمال عليه
و ذهب كل منّا إلى حال سبيله ...

نكتة مسروقة

ثمة بلاد ما علينا في ذكر إسمها جاء فيها وقت ولات غالية ياسر و الأسوام الكل زادت و ماعادش المواطنون و المواطنات خالطين على حتّى شي... عاد ثمة واحد زوّالي قاعد يصطاد عالبحر زهّرت معاه و إصطاد حوتة روح بيها لدارو و قال لمرتو:
ـ ايّا يا مرا ! شاخت عندك هاني جبتلك حوتة اقليهالنا خلينا نعملو فطيّر باهي..
ڨحرتلو مرتو و قالت :
ـ باش تحبني نقليهالك؟ الزيت عندو جمعتين وافي و آش باش يشرّينا توة في دبّوزة زيت!!
قاللها: باهي جيب طرف فحمات و إشويهالنا
هي : ما يساعدناش نشريو ڨاز(guèz) توّة, تي هاو باهي كي نخلطو عالحليب
هو : و على جد بابا ! شعّل طرف الحطب عالڨاز(cuisinière)
هي : دبوزة الڨاز قريب باش توفى من غير ما نضيعو الي فيها على جرد حوتة
كرّز الراجل ورجع للبحر و قال يلعن دين والدين هالنهار الكلب و طيّش الحوتة في الماء....
خرجت الحوتة بعد شوية تعيط : يحيا بن علي!! يحيا بن علي!!..